മുംബൈ: സിനിമാപ്രേമികളും ഹൈന്ദവവിശ്വാസികളും അക്ഷമയോടെ കാത്തിരിക്കുന്ന നിതേഷ് തിവാരി സംവിധാനം ചെയ്യുന്ന രാമായണ എന്ന ബ്രഹ്മാണ്ഡചിത്രത്തിന്റെ ട്രെയ് ലര് പുറത്തിറക്കുന്നത് പാരമ്പര്യവിശ്വാസം അനുസരിച്ചാണ്. ജൂലായ് 30 വ്യാഴാഴ്ച ബ്രാഹ്മ മുഹൂര്ത്തമായ അതിരാവിലെ 4.15നാണ് ട്രെയ് ലര് ലോഞ്ച് ചെയ്യുക.
ഈ സിനിമയുടെ സംഗീതം ടി-സീരീസ് എന്ന കമ്പനി വിലയ്ക്ക് വാങ്ങിയത് 75 കോടി രൂപയ്ക്കാണ്. ഓസ്കാർ ജേതാക്കളായ ഹാൻസ് സിമ്മറും എ.ആർ. റഹ്മാനും ചേർന്നാണ് ചിത്രത്തിന് സംഗീതം ഒരുക്കുന്നത് എന്നത് സിനിമയുടെ മറ്റൊരു പ്രധാന ആകർഷണമാണ്.
ബ്രഹ്മാണ്ഡചിത്രം എന്ന് വിളിക്കാന് ഒരു കാരണമുണ്ട്. 4000 കോടി മുതല് 4800 കോടി രൂപയാണ് ഇതിനായി ചെലവഴിച്ചിരിക്കുന്നത്. നായകന് ശ്രീരാമനായി അഭിനയിക്കുന്ന രണ്ബീര് കപൂറിന് നല്കുന്നത് 150 കോടി രൂപയാണ്. സീതയായി വേഷമിടുന്നത് സായ് പല്ലവിയാണ്. . രാവണന്റെ വേഷത്തിലെത്തുന്നത് സൗത്ത് ഇന്ത്യൻ സൂപ്പർ താരം യാഷ് ആണ്.
സണ്ണി ഡിയോള് ഹനുമാന്റെ വേഷത്തില് എത്തുമ്പോള്, മലയാളത്തിന്റെ പ്രിയ നടി ശോഭന കൈകേയിയായി വേഷമിടുന്നു. ദൂരദർശനിലെ രാമായണത്തില് ശ്രീരാമനായി തിളങ്ങിയ അരുണ് ഗോവില് ഈ ചിത്രത്തില് ദശരഥ മഹാരാജാവായി തിരിച്ചെത്തുന്നുണ്ട്.
ലക്ഷ്മണനായി രവി ദുബെയും ശൂർപ്പണഖയായി രാകുല് പ്രീത് സിംഗും, വിശ്വാമിത്ര മഹർഷിയായി അജിങ്ക്യ ഡിയോയും, ഇന്ദ്രനായി കുനാല് കപൂറും വേഷമിടുന്നുണ്ട്.
പ്രൈം ഫോക്കസ് സ്റ്റുഡിയോസ്, എട്ട് തവണ ഓസ്കാർ പുരസ്കാരം നേടിയ പ്രമുഖ വിഷ്വല് ഇഫക്റ്റ്സ് സ്റ്റുഡിയോയായ ഡിഎൻഇജി, യാഷിന്റെ മോണ്സ്റ്റർ മൈൻഡ് ക്രിയേഷൻസ് എന്നിവർ സംയുക്തമായാണ് ചിത്രം നിർമ്മിക്കുന്നത്.
