കോട്ടയം: കറുകച്ചാല് കള്ളനോട്ട് കേസില് ഇതുവരെ നാലുപേര് അറസ്റ്റിലായെങ്കിലും പ്രധാനപ്രതികളിലേക്കെത്താന് കഴിയാതെ പൊലീസ്. അറസ്റ്റിലായവര് ഇടനിലക്കാര് മാത്രമാണെന്നും അന്തര് സംസ്ഥാന ബന്ധങ്ങള് ഇക്കാര്യത്തില് ഉണ്ടെന്നുമാണ് നിഗമനം.
കറുകച്ചാല് ബിവറേജ് ഷോപ്പില് മദ്യം വാങ്ങാനെത്തിയ യുവാവ് നല്കിയ 500 രൂപയുടെ കള്ളനോട്ടാണ് മറ്റുള്ളവരുടെ അറസ്റ്റിലേക്കും നയിച്ചത്. അതിനിടെ കേസ് ക്രൈംബ്രാഞ്ചിന് കൈമാറുന്നതിനെക്കുറിച്ചും അധികൃതര് ആലോചിക്കുന്നുണ്ട്.
ആനിക്കാട് സ്വദേശി അലക്സ് തോമസ് (23),കറുകച്ചാല് മുതുമരത്തില് മെല്ബര്ട്ട് മാത്യു(25), ആനിക്കാട് രണ്ടുപറയില് ആല്ബിന് തോമസ് (25), ചിറക്കടവ് കോയിപ്പള്ളി ലക്ഷംവീട് കോളനിയില് ബിബിന് ബേബി (36) എന്നിവരാണ് നിലവില് അറസ്റ്റിലുള്ളത്. ഇതുവരെ 500 രൂപയുടെ 135 കളളനോട്ടുകള് കണ്ടെടുത്തു.
