കോഴിക്കോട് : വൃദ്ധസദനങ്ങളുടെ പേര് ‘സ്നേഹാലയം’ എന്ന് മാറ്റിക്കൊണ്ടുള്ള സര്ക്കാര് ഉത്തരവ് നടപ്പാക്കാനും ബന്ധപ്പെട്ട സ്ഥാപനങ്ങളുടെ എല്ലാ രേഖകളിലും പേര് തിരുത്താനും മനുഷ്യാവകാശ കമ്മീഷന് നിര്ദേശം നല്കി. ‘വൃദ്ധര്’ എന്ന പദം മുതിര്ന്ന പൗരന്മാരില് അപകര്ഷതാബോധം ഉണ്ടാക്കുന്നുവെന്ന് ചൂണ്ടിക്കാട്ടി പ്രൊഫ. വര്ഗീസ് മാത്യു സമര്പ്പിച്ച പരാതിയിലാണ് നടപടി.
‘വൃദ്ധസദനം’ എന്നത് പൊതുപ്രയോഗത്തില് നിന്നും ഒഴിവാക്കുന്നതിന് ബോധവല്ക്കരണം നടത്താനും സാമൂഹികനീതി വകുപ്പ് ഡയറക്ടര്ക്ക് കമ്മീഷന് നിര്ദ്ദേശം നല്കിയിട്ടുണ്ട്. നെയിം ബോര്ഡുകള്, ഔദ്യോഗിക വെബ്സൈറ്റുകള്, പ്രസിദ്ധീകരണങ്ങള്, പൊതുജനങ്ങള് ഉപയോഗിക്കുന്ന മറ്റ് രേഖകള് എന്നിവയിലെല്ലാം പേരുമാറ്റം ഉറപ്പാക്കാന് അടിയന്തര നടപടികള് സ്വീകരിക്കണം.
