തിരുവനന്തപുരം: സര്ക്കാര് നിശ്ചയിച്ച സമയക്രമം ലംഘിക്കുന്ന ബാറുകളുടെ ലൈസന്സ് സസ്പെന്ഡ് ചെയ്യുന്നതുള്പ്പെടെയുള്ള കടുത്ത നടപടികള് സ്വീകരിക്കാന് എക്സൈസ് കമ്മിഷണര് നിര്ദേശം നല്കി. രാവിലെ 10 മുതല് രാത്രി 12 വരെയാണ് ബാറുകള് പ്രവര്ത്തിക്കാന് അനുമതിയുള്ളത്. എന്നാല് ചില ബാറുകള് പുലര്ച്ചെ തന്നെ തുറന്ന് പ്രവര്ത്തിക്കുന്നുവെന്ന പരാതികള് വ്യാപകമായിരുന്നു. എക്സൈസ് മന്ത്രി എം. ലിജു തന്നെ ഇക്കാര്യം ഉദ്യോഗസ്ഥരുടെ സാന്നിദ്ധ്യത്തില് പൊതുവേദിയില് വിമര്ശിക്കുകയും ചെയ്തു. ഇതിനു പിന്നാലെയാണ് സമയക്രമം കര്ക്കശമാക്കിക്കൊണ്ട് എക്സൈസ് കമ്മിഷണര് സാംബശിവ റാവു നിര്ദേശം നല്കിയത്.
റേഞ്ച് ഓഫീസര്മാര്ക്കുപുറമെ , ഡെപ്യൂട്ടി കമ്മിഷണര്മാരും മിന്നല്പരിശോധന നടത്തി ഇക്കാര്യം ഉറപ്പുവരുത്തണമെന്ന് ആവശ്യപ്പെട്ടിട്ടുണ്ട്. പരിശോധനയില് വീഴ്ച വരുത്തുകയോ നിയമലംഘനങ്ങള് അവഗണിക്കുകയോ ചെയ്യുന്ന ഉദ്യോഗസ്ഥര്ക്കെതിരെയും നടപടി സ്വീകരിക്കുമെന്ന് കമ്മിഷണര് മുന്നറിയിപ്പ് നല്കി.
