കരുനാഗപ്പള്ളി: കാലപ്പഴക്കം ചെന്നതും, കാര്യക്ഷമത ഇല്ലാത്തതുമായ ബസുകള് പ്രിയദര്ശിനി സൗജന്യ യാത്രക്ക് ഉപയോഗിക്കുന്നത് ആശങ്ക ഉയര്ത്തുന്നു. ഓരോ ദിവസവും 400 കിലോമീറ്ററില് കൂടുതല് സര്വീസ് നടത്തുന്ന കെഎസ്ആര്ടിസി ബസുകള് പത്ത് വര്ഷം കഴിയുമ്പോഴോ പത്ത് ലക്ഷം കിലോമീറ്റര് സര്വീസ് നടത്തുകയോ ചെയ്താല് സ്ക്രാപ്പ് ചെയ്യണമെന്നാണ് ചട്ടം. എന്നാല് കേരളത്തില് നിലവില് സര്വീസ് നടത്തുന്ന മൂവായിരത്തോളം ഓര്ഡിനറി ബസുകള് 15 മുതല് 18 വര്ഷം വരെ കാലപഴക്കം ചെന്നതാണ്.
കേന്ദ്ര നിയമപ്രകാരം 15 വര്ഷമാണ് ബസിന്റെ കാലാവധി. കേരളത്തില് 15 വര്ഷം കഴിഞ്ഞ ബസുകള്ക്ക് ആര്ടിഒ രജിസ്ട്രേഷന് പുതുക്കി നല്കുകയാണ് പതിവ്. പ്രിയദര്ശിനി സൗജന്യ യാത്ര സംവിധാനം വന്നതോടുകൂടി കെഎസ്ആര്ടിസി ബസില് നിയമവിരുദ്ധമായി അമിതമായി യാത്രക്കാരെ കുത്തിനിറച്ചാണ് കൊണ്ടുപോകുന്നത്. ഇത് അപകടം സൃഷ്ടിക്കാന് സാധ്യതയുണ്ട്. 52 സീറ്റുള്ള ബസില് നാലില് ഒന്ന് അതായത് പതിമൂന്ന് പേര്ക്കാണ് നിന്ന് യാത്ര ചെയ്യാന് അനുവാദമുള്ളത്. എന്നാല് ഇപ്പോള് സൗജന്യയാത്രക്കായി അനുവദിച്ച ബസില് നൂറ്റിപത്തും അതില് കൂടുതലും യാത്രക്കാരെ തിരുകിക്കയറ്റിയാണ് സര്വീസ് നടത്തുന്നത്. കാലപ്പഴക്കം ചെന്നതിനാലും, ഫിറ്റ്നസ് ഇല്ലാത്തതു മൂലവും കണ്ടം ചെയ്യേണ്ടതുമായ വാഹനങ്ങളില് ജനങ്ങളെ കുത്തിനിറച്ച് സര്വീസ് നടത്തുന്നത് അപകടകരമാണെന്നാണ് ഈ മേഖലയിലെ വിദഗ്ധരുടെ അഭിപ്രായം. ഇത്തരത്തിലുള്ള രണ്ടായിരത്തോളം ബസുകള് പ്രിയദര്ശിനി സര്വീസുകള്ക്ക് ഉപയോഗിക്കുന്നതായി കണക്കാക്കുന്നു.
അമിതമായി യാത്രക്കാര് കയറുന്നതിനാല് കൃത്യമായി ടിക്കറ്റ് കൊടുക്കാന് കഴിയുന്നില്ലെന്നാണ് ജീവനക്കാര് പറയുന്നത്. സൗജന്യയാത്ര ആയതിനാല് ടിക്കറ്റ് എടുക്കാന് പല യാത്രക്കാരും തയാറാകുന്നില്ല. ചെക്കിങ് നടത്തുമ്പോള് ഇത്തരക്കാരെ പിടികൂടിയാല് ജീവനക്കാരുടെ പിഴവായി കണ്ട് മാനേജ്മെന്റ് ഫൈന് ഈടാക്കുന്നു. ഇതുമൂലം മൂവായിരവും നാലായിരവും ഫൈന് ഇനത്തില് നിരവധി ജീവനക്കാര്ക്ക് അടയ്ക്കേണ്ടി വരുന്നു. ഇത് ജീവനക്കാരുടെ പ്രതിഷേധത്തിന് കാരണമാകുന്നുണ്ട്. ആവശ്യത്തിന് ടയര് ഇല്ലാത്തതും, സ്പെയര്പാര്ട്സ് ഇല്ലാത്തതും, ഓയിലില്ലാത്തതുമെല്ലാം സര്വീസുകളെ വലിയ രീതിയില് ബാധിക്കുന്നുണ്ട്. സൗജന്യ യാത്ര പ്രഖ്യാപിച്ചതിനെ തുടര്ന്ന് പ്രിയദര്ശിനി സര്വീസുകളില് വന്തിരക്കാണ് അനുഭവപ്പെടുന്നത്. കാലപ്പഴക്കംമൂലം കണ്ടം ചെയ്യേണ്ട ബസുകളെ ഒഴിവാക്കി പുതിയ വാഹനങ്ങള് ഇതിനായി ഉപയോഗിക്കണമെന്നാണ് ആവശ്യം ഉയരുന്നത്. ദുരന്തങ്ങള് ഉണ്ടാകുന്നതിനു മുമ്പ് വേണ്ട മുന്കരുതലുകള് അധികൃതരുടെ ഭാഗത്തുനിന്നും ഉണ്ടാകുമെന്നാണ് പ്രതീക്ഷ.
ജന്മഭൂമി ഓണ്ലൈന്