അയോധ്യയിലെ അന്തപ്പുരത്തില് രാമന് രാജ്യഭരണമേല്ക്കണോ അതോ ഭരതന് യുവരാജാവാകണോ എന്നതില് ചേരിതിരിവ് ഉണ്ടായിരുന്നു എന്നും കൊട്ടാരക്കെട്ടിന്റെ ഇടനാഴികളില് അധികാരം പിടിക്കാന് ഇരുകൂട്ടരുടേയും ഉപജാപങ്ങള് അരങ്ങേറിയിരുന്നുവെന്നും ചില നിരീക്ഷണങ്ങളുണ്ടായിട്ടുണ്ട്. ഇങ്ങനെയുള്ള നിഗമനങ്ങളിലേക്ക് ആളുകള് എത്താന് മുഖ്യകാരണം അധ്യാത്മരാമായണ പരാമര്ശവുമാണ്.
”വന്നീല മാതുലനെ കാണ്മതിന്നേറെ
മുന്നമേ പോയ ഭരതശത്രുഘ്നന്മാര്
വന്നമുഹൂര്ത്തമടുത്തദിനംതന്നെ
പുണ്യമതീവപുഷ്യം നല്ല നക്ഷത്രം
എന്നാലവര്വരുവാന്പാര്ക്കയില്ലിനി
യൊന്നുകൊണ്ടുമതു നിര്ണ്ണയം മാനസേ…”
എന്ന് ദശരഥന് പറയുന്നതായാണ് അധ്യാത്മരാമായാണം കിളിപ്പാട്ടില് കാണുന്നത്. ദശരഥന്റെ ഈ വാക്കുകളില് തെളിയുന്നത് എത്രയും പെട്ടെന്ന് രാമാഭിഷേകം പൂര്ത്തിയാക്കാനുള്ള അതിവ്യഗ്രതയാണ്.
ഈ വരികള് മാത്രം വച്ചു ചിന്തിച്ചാല് ആദ്യം പറഞ്ഞ കൊട്ടാരക്കെട്ടിലെ ഉപജാപങ്ങളൊക്കെ ശരിയായിരിക്കാം എന്നു നമുക്കും തോന്നും.
എന്നാല് വാല്മീകി രാമായണം വായിച്ചാല് മറ്റൊരു ചിത്രമാണ് ലഭിക്കുക.
അവിടെ തന്റെ മരണം ഏതാനും ദിവസത്തിനകം ഉണ്ടാവുമെന്ന ബോധ്യമാണ് ഭരതശത്രുഘ്നന്മാര് വരുംമുമ്പേ തിരക്കിട്ട് രാമാഭിഷേകം നടത്താന് ദശരഥനെ പ്രേരിപ്പിച്ചതെന്നു വാല്മീകി വ്യക്തമാക്കുന്നു.
യോദ്ധ്യാകാണ്ഡം നാലാം സര്ഗ്ഗത്തിലെ 17 മുതല് 22 വരെ ശ്ലോകങ്ങള് സംശയലേശമന്യേ ഇക്കാര്യം വ്യക്തമാക്കുന്നുണ്ട്.
”അപി ചാദ്യശുഭാന് രാമ
സ്വപ്നാന് പശ്യാമി രാഘവ
സനിര്ഘാതാ ദിവോല്കാശ്ച
പതന്തി മഹാസ്വനാ
അവിഷ്ടബ്ധം ച മേ രാമ
നക്ഷത്രം ദാരുണഗ്രഹൈഃ
ആവേദയന്തി ദൈവജ്ഞാഃ
സൂര്യാങ്ഗാരകരാഹുഭിഃ
പ്രായേണ ച നിമിത്താനാം
ഈദൃശാനാം സമുദ്ഭവേ
രാജാ ഹി മൃത്യുമാപ്നോതി
ഘോരാം ചാപദമൃച്ഛതി
തദ് യാവദേവ മേ ചേതോ
ന വിമുഹ്യതി രാഘവ
താവദേവാഭിഷിഞ്ചസ്വ
ചലാ ഹി പ്രാണിനാം മതിഃ
തത്ര പുഷ്യേഭിഷിഞ്ചസ്വ
മനസ്ത്വരയതീവ മാം
ശ്വസ്ത്വാഹമഭിഷേക്ഷ്യാമി
യൗവരാജ്യേ പരന്തപ.”
ദശരഥന് പുത്രനായ രാമനോടു പറയുകയാണ്:
”ചില അശുഭങ്ങളായ സ്വപ്നങ്ങള് ഞാന് കാണുന്നു. ഇടിയോടുകൂടി കൊള്ളിമീന്(ഉല്ക്ക) ഉഗ്രശബ്ദത്തോടെ വീഴുന്നതായി ഞാന് സ്വപ്നം കാണുന്നു(ഉല്ക്കാപതനം നേരിട്ടിയാലും സ്വപ്നത്തിലായാലും കാണുന്നത് ദോഷസൂചനയാണ്). എന്റെ(ദശരഥന്റെ) നക്ഷത്രത്തിന് സൂര്യന്, കുജന്, രാഹു എന്നീ ക്രൂരഗ്രഹങ്ങളുടെ ബാധയുണ്ട് എന്ന് ജ്യോത്സ്യന്മാര് പയുന്നു. ഇത്തരം ദുര്നിമിത്തങ്ങള് സൂചിപ്പിക്കുന്നത് രാജാവിന് മരണമോ വലിയ ആപത്തോ ഉണ്ടാവാമെന്നാണ്. എന്റെ പ്രാണന് ശരീരം വിടുന്നതിനു മുമ്പേ നീ(രാമന്) അഭിഷിക്തനാവണം. ഇന്ന് ചന്ദ്രന് പുണര്തം നക്ഷത്രത്തിലാണ്. പൂയം നാളായ നാളെ നല്ല ദിവസമാണെന്നു ജ്യോത്സ്യന്മാര് പയുന്നു. നാളെത്തന്നെ അഭിഷേകകര്മ്മം നടക്കണം. എന്റെ മനസ്സ് ഇക്കാര്യത്തില് എന്നെ തിടുക്കപ്പെടുത്തുന്നു. നാളെത്തന്നെ ഞാന് നിന്റെ യൗവരാജ്യാഭിഷേകം നടത്താം”എന്ന്്.
താന് ആസന്നമൃത്യു ആയിരിക്കുന്നു എന്ന പരിപൂര്ണ ബോധ്യത്തിലാണ് രാജാ ദശരഥന് ഇവിടെ രാമന്റെ യൗവരാജ്യാഭിഷേകം ഒറ്റദിവസംകൊണ്ടു നടത്താന് തീരുമാനിച്ചതെങ്കിലും, വിച്ഛിന്നാഭിഷേകത്തോടെ ആ തീരുമാനം തന്നെ അദ്ദേഹത്തിന്റെ മരണകാരണമായി മാറി. വിധിവിളയാട്ടം എങ്ങനെയാണ് മനുഷ്യനിശ്ചയങ്ങളെ മാറ്റിമറിക്കുക എന്നതിനുകൂടി ഈ രാമായണഭാഗം ഉദാഹരണമാകുന്നുണ്ട്.
ജന്മഭൂമി ഓണ്ലൈന്