പത്തനംതിട്ട: ശബരിമല തീര്ത്ഥാടകര്ക്ക് സുരക്ഷവും സുഗമവുമായ യാത്ര ഉറപ്പുവരുത്താന് 450 കോടി രൂപയുടെ സമഗ്ര റോഡ് വികസന പാക്കേജ് തയ്യാറാക്കി വരികയാണെന്ന് പൊതുമരാമത്ത് മന്ത്രി പി.കെ. ബഷീര്. ഇത്തവണ തീര്ത്ഥാടന സീസണിന് മുന്പേ തയ്യാറെടുപ്പുകള് ആരംഭിച്ചതായി മന്ത്രി പറഞ്ഞു. എല്ലാ ജോലികളും മണ്ഡല-മകരവിളക്ക് സീസണ് ആരംഭിക്കുന്നതിന് മുമ്പ് പൂര്ത്തിയാക്കുകയാണ് ലക്ഷ്യം.
ജൂലായ് മുതല് നവംബര് വരെയുള്ള ഘട്ടങ്ങളിലാണ് പദ്ധതികള് നടപ്പാക്കുക. മുന്വര്ഷങ്ങളിലെ പൂര്ത്തിയാകാത്ത പ്രവൃത്തികള്ക്ക് മുന്ഗണന നല്കും. റോഡ് നവീകരണം, സുരക്ഷ, സൗകര്യങ്ങള് മെച്ചപ്പെടുത്തല്, അപകടസാധ്യതയുള്ള സ്ഥലങ്ങളില് ക്രാഷ് ബാരിയര്, സ്പീഡ് ബ്രേക്കര്, റിഫ്ളക്ടര്, സൈന്ബോര്ഡുകള് സ്ഥാപിക്കല്, റോഡിലെ ദൃശ്യപരത ഉറപ്പാക്കല്, റെസ്റ്റ് ഹൗസുകളുടെ നവീകരണം എന്നിവയാണ് നടപ്പാക്കുക. പൊതുമരാമത്ത് വകുപ്പ്, ദേശീയപാത അതോറിറ്റി, കേരള വാട്ടര് അതോറിറ്റി എന്നിവയുടെ സംയുക്ത യോഗങ്ങളും എംഎല്എമാരുടെ പ്രത്യേക യോഗങ്ങളും വിളിച്ചുചേര്ത്ത് പ്രവൃത്തികള് ഏകോപിപ്പിക്കും.
