ആലപ്പുഴ: നെഹ്റുട്രോഫി ജലമേളയുടെ സ്റ്റേജും താത്കാലിക പവലിയനും നിര്മ്മിക്കുന്ന ചുമതല വിവാദ ഇവന്റ്മാനേജ്മെന്റ് കമ്പനിക്ക് നല്കാന് നീക്കമെന്ന് ആക്ഷേപം. കലൂര് സ്റ്റേഡിയത്തില് ഉമാ തോമസ് എംഎല്എക്ക് അപകടമുണ്ടായ പരിപാടി സംഘടിപ്പിച്ച ഓസ്കാര് ഇവന്റ്സിന് കരാര് നല്കാനാണ് ആലോചന. കരാര് വ്യവസ്ഥകള് ലംഘിച്ചാണ് കമ്പനിയെ കൊണ്ടുവന്നത് എന്നാണ് ആരോപണം. എതിര്പ്പ് മറികടന്ന് ഓസ്കാര് ഇവന്റ്സിന് കരാര് നല്കാനാണ് ജില്ലാ ഭരണകൂടത്തിന്റെ നീക്കമെന്നാണ് വിമര്ശനം.
കൊച്ചി കലൂര് സ്റ്റേഡിയത്തില് ഓസ്കാര് ഇവന്റ്സ് കമ്പനി ഒരുക്കിയ വേദിയില് നിന്നായിരുന്നു ഉമാ തോമസിന് വീണ് ഗുരുതരമായി പരിക്കേറ്റത്. ഇതേ പരിപാടിയില് സിനിമാ താരത്തിന്റെ നൃത്തപരിപാടി സംഘടിപ്പിച്ചതിന്റെ വീഡിയോ ദൃശ്യങ്ങള് കളക്ടര്ക്ക് മുന്നില് പ്രദര്ശിപ്പിച്ചാണ് നെഹ്റുട്രോഫി ജലമേളയിലും കരാര് നേടാന് ഓസ്കാര് ഇവന്റ്സ് ശ്രമിച്ചത്.
കരാര് ഓസ്കാറിന് തന്നെ നല്കാന് ഏകദേശ ധാരണയാവുകയും ചെയ്തു. ഇതിനിടെയാണ് എന്ടിബിആര് എക്സിക്യൂട്ടീവ് കമ്മിറ്റിയില് എതിര്പ്പുയര്ന്നത്. ഉമാ തോമസ് എംഎല്എക്ക് അപകടമുണ്ടായ പരിപാടിയുടെ നടത്തിപ്പുകാര് തന്നെയാണ് നെഹ്റു ട്രോഫിയിലേക്കും എത്തുന്നതെന്നത് പരസ്യമായതോടെ പ്രതിഷേധം വ്യാപകമായി. നിശ്ചിത സമയത്തിനുള്ളില് ക്വട്ടേഷന് സമര്പ്പിക്കാത്ത കമ്പനിയെ നടപടിക്രമങ്ങള് ലംഘിച്ച് പരിഗണിക്കുകയാണെന്ന് കമ്മിറ്റി അംഗങ്ങള് ആരോപിക്കുന്നു.
ആയിരക്കണക്കിന് ആളുകള് എത്തുന്ന നെഹ്റു ട്രോഫി ജലമേളയുടെ പവലിയന് നിര്മ്മാണത്തിന് വിവാദത്തിലായ കമ്പനിയെ പരിഗണിക്കുന്നതിനെതിരെ എക്സിക്യൂട്ടീവ് കമ്മിറ്റി അംഗങ്ങള് പ്രതിഷേധം ഉയര്ത്തി. വിഷയത്തില് ജില്ലാ ഭരണകൂടത്തിന്റെയും നെഹ്റു ട്രോഫി ബോട്ട് റേസ് സൊസൈറ്റിയുടെയും വിശദീകരണമാണ് നിര്ണായകമാകുക.
