നാഗര്കോവില്: ട്രെയിന് സര്വീസുകള് കൂടുതല് സുരക്ഷിതവും കാര്യക്ഷമവും പേപ്പര് രഹിതവുമാക്കുന്നതിനായി ദക്ഷിണ റെയില്വേ വികസിപ്പിച്ച മൂന്ന് പുതിയ ഡിജിറ്റല് ആപ്ലിക്കേഷനുകള് ജനറല് മാനേജര് ആര്.എന്. സിങ് വെള്ളിയാഴ്ച ഉദ്ഘാടനം ചെയ്തു. ഇടിഎസ്ആര് (ഇലക്ട്രോണിക് ട്രെയിന് സിഗ്നല് രജിസ്റ്റര്), ആര്ബിഎംഎസ് (റെയില്വേ ബ്ലോക്ക് മാനേജ്മെന്റ് സിസ്റ്റം) ഡിഒഎസ്ടി (ഡെലിവറിംഗ് ഒക്യുപേഷണല് സേഫ്റ്റി ഓണ് ട്രാക്ക്) എന്നീ ഇന്ഹൗസ് ആപ്ലിക്കേഷനുകളാണ് അവതരിപ്പിച്ചത്.
പരമ്പരാഗത പേപ്പര് അധിഷ്ഠിത ട്രെയിന് സിഗ്നല് രജിസ്റ്ററിന് പകരമായി ഇടിഎസ്ആര് ഇലക്ട്രോണിക് രജിസ്റ്റര് സംവിധാനം നടപ്പാക്കും. ട്രെയിന് നീക്കങ്ങളുടെ വിവരങ്ങള് സ്വയമേവ രേഖപ്പെടുത്തുന്നതിലൂടെ മാനുഷിക പിഴവുകള് കുറയുകയും സ്റ്റേഷന് മാസ്റ്റര്മാരുടെ ജോലി കൂടുതല് എളുപ്പമാകുകയും ചെയ്യും. റെയില്വേ ബ്ലോക്കുകളുടെ അപേക്ഷ മുതല് അനുമതി, ഉപയോഗം, സമയം നീട്ടല്, അവസാനിപ്പിക്കല് എന്നിവ വരെ പൂര്ണമായും ഡിജിറ്റലായി കൈകാര്യം ചെയ്യാന് ആര്ബിഎംഎസ് സഹായിക്കും.
വിവിധ ഉദ്യോഗസ്ഥര്ക്കായി പ്രത്യേക ഡാഷ്ബോര്ഡുകളും സുരക്ഷിതമായ ഒടിപി ലോഗിന് സംവിധാനവും ഇതിലുണ്ട്. ട്രാക്കില് ജോലി ചെയ്യുന്ന ജീവനക്കാരുടെ സുരക്ഷ ഉറപ്പാക്കാന് വികസിപ്പിച്ച ഡിഒഎസ്ടി ആപ്ലിക്കേഷന്, ട്രെയിന് സമീപിക്കുന്ന വിവരം ജിപിഎസ് അധിഷ്ഠിതമായി മുന്കൂട്ടി തിരിച്ചറിഞ്ഞ് ശബ്ദം, വൈബ്രേഷന്, ദൃശ്യ മുന്നറിയിപ്പ് എന്നിവ നല്കും. അടിയന്തര എസ്ഒഎസ് സൗകര്യവും ഇതില് ഉള്പ്പെടുത്തിയിട്ടുണ്ട്. റെയില്വേ പ്രവര്ത്തനങ്ങള് കൂടുതല് സുരക്ഷിതവും സ്മാര്ട്ടുമായി മാറ്റുന്നതിനൊപ്പം, ജീവനക്കാരുടെ ജോലിഭാരം കുറയ്ക്കുകയും വേഗത്തിലുള്ള തീരുമാനമെടുക്കല് സാധ്യമാക്കുകയും ചെയ്യുന്നതാണ് ഈ മൂന്ന് ഡിജിറ്റല് സംവിധാനങ്ങളുടെ പ്രധാന ലക്ഷ്യമെന്ന് ജനറല് മാനേജര് ആര്.എന്. സിങ് പറഞ്ഞു.
സ്റ്റേഷന് മാസ്റ്റര്മാര്, കണ്ട്രോളര്മാര്, എന്ജിനിയറിങ്, സിഗ്നല് ടെലികമ്മ്യൂണിക്കേഷന്, ട്രാക്ക് പരിപാലന വിഭാഗങ്ങളിലെ ജീവനക്കാര്ക്ക് ഈ പദ്ധതികള് നേരിട്ട് പ്രയോജനപ്പെടും.
