പത്തനംതിട്ട: ശബരിമലയില്‍ നിന്ന് കഴിഞ്ഞവര്‍ഷം ദ്വാരപാലക പാളികള്‍ കടത്തിയതിലൂടെ മുന്‍ ദേവസ്വം ബോര്‍ഡ് പ്രസിഡന്റ് പി.എസ്. പ്രശാന്ത് ലക്ഷ്യമിട്ടത് 2019ന് സമാനമായ കൊള്ള. സന്നിധാനത്ത് നിന്ന് പാളികള്‍ കടത്താന്‍ പ്രശാന്തിനൊപ്പം അന്നത്തെ ബോര്‍ഡ് മെമ്പര്‍ അഡ്വ. എ. അജികുമാറും കൂട്ടുനിന്നെന്നു വ്യക്തമായതോടെയാണ് ഇവരെ ഇന്നലെ പ്രത്യേക അന്വേഷണ സംഘം അറസ്റ്റു ചെയ്തത്. കേസില്‍ തിരുവാഭരണ കമ്മിഷണര്‍ അടക്കമുള്ളവരും പ്രതിയായേക്കും.
2023 നവംബറില്‍ അധികാരത്തില്‍ എത്തിയതു മുതല്‍ ദ്വാരപാലക പാളികളില്‍ സ്വര്‍ണം പൂശണമെന്ന ആവശ്യം പി.എസ്. പ്രശാന്ത് ഉന്നയിച്ചിരുന്നു. 2024 മണ്ഡലകാലത്തിന് മുമ്പ് പാളികള്‍ സ്വര്‍ണം പൂശി തിരികെ എത്തിക്കാനായിരുന്നു ലക്ഷ്യമിട്ടിരുന്നതെങ്കിലും തീരുമാനമെടുത്തത് 2024 നവംബര്‍ ഒന്നിന് മാത്രമാണ്. ദ്വാരപാലക പാളികളോടൊപ്പം ശ്രീകോവിലിന്റെ കട്ടിള പാളികളും കതകും സോപാന കമാനവും കടത്താന്‍ തീരുമാനമെടുത്തതായി 2025 സപ്തംബര്‍ 2ലെ ആര്‍ ഒ സി 11563/ 24 എം നമ്പര്‍ ദേവസം ബോര്‍ഡ് രേഖ വ്യക്തമാക്കുന്നു.
ചെന്നൈ സ്മാര്‍ട്ട് ക്രിയേഷന്‍സിന് സ്വര്‍ണം പൂശുന്നതില്‍ വൈദഗ്ധ്യമില്ലെന്നുള്ള തിരുവാഭരണം കമ്മിഷണറുടെ അഭിപ്രായം എട്ട് ദിവസങ്ങള്‍ക്ക് ശേഷം തിരുത്തിയതും പ്രശാന്തിന് വിനയായി. 2024 നവംബറില്‍ തന്നെ ദ്വാരപാലക പാളികള്‍ സ്വര്‍ണം പൂശാന്‍ ഉണ്ണികൃഷ്ണന്‍ പോറ്റിയെ സ്‌പോണ്‍സറാക്കാന്‍ ബോര്‍ഡ് തീരുമാനിച്ചതിന് രേഖയുണ്ട്.
ദ്വാരപാലക പാളികള്‍ സ്വര്‍ണം പൂശി തിരികെ എത്തിച്ച ശേഷം കതക്, കട്ടിള പാളികള്‍ അടക്കമുള്ളവയുടെ സ്‌പോണ്‍സര്‍ഷിപ്പും ഉണ്ണികൃഷ്ണന്‍ പോറ്റിക്ക് നല്‍കാന്‍ തീരുമാനിച്ചിരുന്നു.
ദ്വാരപാലക പാളികളുടെ പല ഭാഗങ്ങളും പൊട്ടി നിക്കല്‍ തെളിഞ്ഞുവെന്നും നിറം മങ്ങിയെന്നുമുള്ള കാരണം പറഞ്ഞായിരുന്നു പാളികള്‍ കടത്താന്‍ 2025 സപ്തംബര്‍ 2ന് കൂടിയ ബോര്‍ഡ് യോഗത്തില്‍ തീരുമാനം എടുത്തത്. ഇതില്‍ ദേവസ്വം പ്രസിഡന്റ് പി.എസ്. പ്രശാന്തും മെമ്പര്‍ അഡ്വ. എ. അജി കുമാറും ഒപ്പിട്ടിട്ടുണ്ട്.
ദേവസ്വം രേഖകള്‍ പ്രകാരം പാളി കടത്തലില്‍ തിരുവാഭരണ കമ്മിഷണര്‍ക്ക് മുഖ്യ പങ്കുണ്ടെന്ന് വ്യക്തമാണ്. ആറ് ഭാഗങ്ങള്‍ വീതം അടങ്ങിയ ദ്വാരപാലക ശില്‍പപാളികള്‍, പീഠം, താങ്ങുപീഠം എന്നിവ പൊട്ടി നിക്കല്‍ തെളിഞ്ഞതായും നിറംമങ്ങിയതായും റിപ്പോര്‍ട്ട് ചെയ്തത് തിരുവാഭരണ കമ്മിഷണറാണ്. 2019ല്‍ സ്മാര്‍ട്ട് ക്രിയേഷന്‍സുമായുള്ള കരാര്‍ പ്രകാരം സ്വര്‍ണം പൂശലിന് 40 വര്‍ഷ ഗ്യാരന്റിയാണ് ഉള്ളത്.
പാളികള്‍ക്ക് പൊട്ടല്‍ സംഭവിച്ചാല്‍ ഗ്യാരന്റി നഷ്ടമാകുമെന്ന് വ്യവസ്ഥയുണ്ട്. അതിനാല്‍ ഗ്യാരന്റി ഒഴിവാക്കി കമ്പനിയെ രക്ഷിക്കാന്‍ തട്ടിക്കൂട്ടിയ കഥയാണ് പാളികളിലെ പൊട്ടലെന്ന് എസ്‌ഐടി സംശയിക്കുന്നു.
