ന്യൂദല്‍ഹി: ഭാരത പ്രതിരോധ മേഖലയ്ക്ക് കരുത്തു പകരാന്‍ ലക്ഷ്യമിട്ട് വന്‍കിട എയര്‍ഷിപ്പുകളുടെ നിര്‍മാണ രംഗത്തേക്ക് ചുവടുവെച്ച് പ്രമുഖ കമ്പനിയായ ഭാരത് ഫോര്‍ജ്. ഇതിനായി ഫ്രഞ്ച്- കനേഡിയന്‍ എയ്റോസ്പേസ് കമ്പനിയായ ‘ഫ്‌ലൈയിങ് വെയില്‍സു’മായി ഭാരത് ഫോര്‍ജ് ധാരണാപത്രത്തില്‍ ഒപ്പുവച്ചു.
ഫാര്‍ണ്‍ബറോ ഇന്റര്‍നാഷണല്‍ എയര്‍ഷോയില്‍ വച്ചാണ് ഈ നിര്‍ണായക കരാര്‍ ഒപ്പുവച്ചത്. കേന്ദ്ര സര്‍ക്കാരിന്റെ ‘ആത്മനിര്‍ഭര്‍ ഭാരത്’, ‘മെയ്‌ക്ക് ഇന്‍ ഇന്ത്യ’ പദ്ധതികളുടെ ഭാഗമായി ഇന്ത്യയില്‍ തന്നെ ഇത്തരം അത്യാധുനിക എയര്‍ഷിപ്പുകള്‍ നിര്‍മിക്കാനുള്ള സൗകര്യം ഒരുക്കുകയാണ് ഈ കൂട്ടായ്‌മയുടെ പ്രധാന ലക്ഷ്യം.
പുതിയ കരാര്‍ പ്രകാരം, പ്രതിരോധ ആവശ്യങ്ങള്‍ക്കായുള്ള എയര്‍ഷിപ്പുകള്‍ ഇന്ത്യയില്‍ നിര്‍മിക്കാനും വികസിപ്പിക്കാനും ഭാരത് ഫോര്‍ജിന്റെ എയ്റോസ്പേസ് വിഭാഗവും ഫ്‌ലൈയിങ് വെയില്‍സും ഒന്നിച്ച് പ്രവര്‍ത്തിക്കും. വളര്‍ന്നുവരുന്ന എയ്റോസ്പേസ് മേഖലയില്‍ ഇന്ത്യയെ സ്വയംപര്യാപ്തമാക്കാന്‍ ഇതിലൂടെ സാധിക്കും.
ഒറ്റത്തവണ 60 ടണ്‍ വരെ ഭാരം വഹിക്കാന്‍ ശേഷിയുള്ള ഫ്‌ലൈയിങ് വെയില്‍സിന്റെ ‘എല്‍സിഎ60ടി’ എയര്‍ഷിപ്പുകളാണ് ഈ കൂട്ടായ്‌മയിലൂടെ പ്രധാനമായും ഭാരതത്തില്‍
നിര്‍മിക്കുക. ഹെലികോപ്റ്ററുകളെ പോലെ ലംബമായി പറന്നുയരാനും താഴെയിറങ്ങാനും ഇവയ്‌ക്ക് സാധിക്കും.
ഹൈബ്രിഡ്-ഇലക്ട്രിക് സാങ്കേതികവിദ്യയില്‍ പ്രവര്‍ത്തിക്കുന്ന ഈ എയര്‍ഷിപ്പുകള്‍ക്ക് വലിയ അടിസ്ഥാന സൗകര്യങ്ങള്‍ ആവശ്യമില്ല. അതിനാല്‍ തന്നെ എത്തിപ്പെടാന്‍ ബുദ്ധിമുട്ടുള്ളതും വിദൂരവുമായ പ്രദേശങ്ങളില്‍ ഇവ എളുപ്പത്തില്‍ ഉപയോഗിക്കാന്‍ കഴിയും.
അതിര്‍ത്തികളിലേക്കും മറ്റും സൈനികര്‍ക്ക് ആവശ്യമായ സാധനങ്ങള്‍ എത്തിക്കുക, വലിപ്പമേറിയ സൈനിക ഉപകരണങ്ങളുടെ ഗതാഗതം, നിരീക്ഷണം, ആശയവിനിമയ സംവിധാനങ്ങള്‍ ഏകോപിപ്പിക്കുക, ദുരന്തനിവാരണ-രക്ഷാപ്രവര്‍ത്തനങ്ങള്‍ തുടങ്ങിയവയ്‌ക്ക് ഈ എയര്‍ഷിപ്പുകള്‍ വലിയൊരു മുതല്‍ക്കൂട്ടാകും.
ഈ പദ്ധതിയിലൂടെ ഉയര്‍ന്ന സാങ്കേതികവിദ്യ ആവശ്യമായ നിരവധി തൊഴിലവസരങ്ങള്‍ സൃഷ്ടിക്കപ്പെടും. കൂടാതെ, ഭാരതത്തിന്റെ എയ്റോസ്പേസ് വിതരണ ശൃംഖലയെ ശക്തിപ്പെടുത്താനും ഭാവിയില്‍ മികച്ച കയറ്റുമതി സാധ്യതകള്‍ തുറക്കാനും ഇതിലൂടെ സാധിക്കും.
