ഗ്ലാസ്ഗോ: നാല് വര്ഷത്തിന് ശേഷം അഹമ്മദാബാദിലൂടെ കോമണ്വെല്ത്ത് ഗെയിംസ് ആതിഥേയരാകാനൊരുങ്ങുന്ന ഭാരതം ഇക്കുറി എത്രത്തോളം മെച്ചപ്പെടുത്തുമെന്ന് ലോകം ഒന്നാകെ ഉറ്റുന്നോക്കും. കഴിഞ്ഞ തവണ ബിര്മിങ്ങാമില് 22 സ്വര്ണം ഉള്പ്പെടെ 61 മെഡലുകലാണ് ഭാരതം നേടിയത്. പട്ടികയില് നാലാം സ്ഥാനത്ത് ഫിനിഷ് ചെയ്തിരുന്നു. ഒളിംപിക്സ് സ്വര്ണമെഡല് ജേതാവായിരുന്ന നീരജ് ചോപ്ര കഴിഞ്ഞ തവണ മത്സരിച്ചിരുന്നില്ല. ഇക്കുറി നീരജ് മത്സരിക്കുന്നുണ്ട്. പാകിസ്ഥാന്റെ ജാവലിന് താരം അര്ഷാദ് നദീമും മത്സരത്തിനുണ്ട്. ഒളിംപിക്സില് നീരജിനെ മറികടന്ന് അര്ഷാദ് സ്വര്ണം നേടിയിരുന്നു. അതിന് ശേഷം ഇരു താരങ്ങളും നേര്ക്കുനേര് വരുന്ന വേദി കൂടിയാണ് ഈ കോമണ്വെല്ത്ത് ഗെയിംസ്.
124 താരങ്ങളാണ് ഭാരതത്തെ പ്രതിനിധാനം ചെയ്യാന് ഗ്ലാസ്ഗോയില് എത്തിയിരിക്കുന്നത്. അത്ലറ്റിക്സ് ഇനങ്ങള്ക്ക് പുറമെ ബോക്സിങ്, ഭാരോദ്വഹനം, ജ്യൂഡോ, ആര്ട്ടിസ്റ്റിക് ജിംനാസ്റ്റിക്സ്, ട്രാക്ക് സൈക്ലിങ്, ബോള്സ്, സ്വിമ്മിങ് എന്നിവയിലും ഭാരത താരങ്ങള് മത്സരിക്കുന്നുണ്ട്. ഇതേ ഗെയിംസിനോട് ചേര്ന്ന് നടക്കുന്ന പാരാ അത്ലറ്റിക്സ് മത്സരങ്ങളിലും ഭാരത താരങ്ങള് മാറ്റുരയ്ക്കുന്നുണ്ട്. 3-3 വീല്ചെയര് ബാസ്കറ്റ്ബോള്, പാരാ പവര്ലിഫ്റ്റിങ്, പാരാ സ്വിമ്മിങ്, പാരാ ട്രാക്ക് സൈക്ലിങ് എന്നിവയിലും ഭാരതത്തിനായി താരങ്ങളിറങ്ങും.
ഗെയിംസിന്റെ ഏറ്റവും വലിയ ആകര്ഷണമാകുന്ന അത്ലറ്റിക്സ് മത്സരങ്ങള് 27ന് ആരംഭിക്കുമ്പോള് മലയാളി താരം മുരളി ശ്രീശങ്കര് അടക്കമുള്ളവര് പ്രതീക്ഷയോടെ കാത്തിരിക്കുകയാണ്. ആഗസ്ത് ഒന്നിനാണ് പുരുഷ ജാവലിന് ത്രോ ഫൈനല്. 2018ലെ ഗോള്ഡ് കോസ്റ്റ് കോമണ്വെല്ത്ത് ഗെയിംസില് നീരജ് സ്വര്ണം നേടിയിരുന്നു.
26-30 തീയതികളിലായാണ് ഭാരോദ്വഹന മത്സരങ്ങള് നടക്കുക. മിരാബായി ചാനു പ്രതീക്ഷാ താരമായി ഇറങ്ങുന്നുണ്ട്.
ഭാരത മത്സരങ്ങള് തുടങ്ങുന്നത് ലോന് ബോള്സിലൂടെ
കോമണ്വെല്ത്ത് ഗെയിംസ് 2026ന് തിരി തെളിയുന്ന ഇന്ന് ഭാരതത്തിന് രണ്ട് മത്സരങ്ങള്. വനിതാ ലോന് ബോള്സ് മത്സരത്തോടെ ഭാരതം കോമണ്വെല്ത്ത് ഗെയിംസില് ഇന്ന് തുടുക്കം കുറിക്കും. ഇതിന് പിന്നാലെ പുരുഷ ലോന്സ് ടീമിന്റെ മത്സരവും അരങ്ങേറും. വൈകീട്ട് 4.50ന് മാള്ട്ടയ്ക്കെതിരെയാണ് വനിതകളുടെ പോരാട്ടം. 6.15ന് പുരുഷ ടീം കാനഡയ്ക്കെതിരെയും മത്സരിക്കും.
കഴിഞ്ഞ തവണ ബിര്മിങ്ങാം കോമണ്വെല്ത്ത് ഗെയിംസില് വനിതാ ലോന് ബൗള്സ് മത്സരത്തില് സ്വര്ണം നേടിയത് ഭാരതമായിരുന്നു. ലൗലി ചൗബി, പിങ്കി, നയന്മോനി സൈക, രൂപ റാണി ടിര്ക്കി എന്നിവരടങ്ങിയ ടീം ആണ് ഭാരതത്തിനായി സ്വര്ണം നേടിയത്. കഴിഞ്ഞ തവണ ലോന് ബൗള്സ് പുരുഷ ടീം വെള്ളി മെഡല് നേടിയിരുന്നു.
