തിരുവനന്തപുരം:മെഡിക്കല് കോളേജിലെ സഹപാഠികളായ പെണ്കുട്ടികളുടെ ചിത്രം മോര്ഫ് ചെയ്ത് പ്രചരിപ്പിച്ച എം ബി ബി എസ് വിദ്യാര്ത്ഥി പിടിയില്.തിരുവനന്തപുരം മെഡിക്കല് കോളേജിലെ മൂന്നാം വര്ഷ വിദ്യാര്ഥി വയനാട് സ്വദേശി ആബേല് ആണ് പിടിയിലായത്.
ആദ്യം ഒരു പെണ്കുട്ടി പരാതി നല്കി.ജാമ്യമില്ലാ വകുപ്പുകള് ചുമത്തുമെന്ന് പൊലീസ് പറഞ്ഞിട്ടും ആബേലിന് കോടതിയില് നിന്ന് ജാമ്യം കിട്ടി.തുടര്ന്ന് പരാതികളുമായി കൂടുതല് പെണ്കുട്ടികള് പൊലീസിനെ സമീപിച്ചു.
എന്നാല് ഈ കേസുകളിലെല്ലാം പ്രതി ഒരാളായതിനാല് ഒരു എഫ്ഐആര് മാത്രമേ എടുക്കാനാകൂ എന്നാണ് പൊലീസ് പറയുന്നത്.പരാതിക്കാരായ മറ്റ് പെണ്കുട്ടുികളുടെ മൊഴി രേഖപ്പെടുത്താന് പൊലീസ് തയാറാകുന്നില്ലെന്ന് ആരോപിച്ച് രാത്രി വൈകിയും മെഡിക്കല് കോളേജ് പൊലീസ് സ്റ്റേഷനില് വിദ്യാര്ഥിനികളും വിദ്യാര്ത്ഥികളും പ്രതിഷേധിക്കുകയാണ്.
അബേലിനെതിരെ നിസാര വകുപ്പുകള് ചുമത്തിയെന്ന് ആരോപണമുണ്ട്.വിദ്യാര്ഥിനികളുടെ ചിത്രങ്ങള് ഇന്സ്റ്റഗ്രാമില് നിന്നെടുത്ത് ആബേല് മോര്ഫ് ചെയ്ത് പ്രചരിപ്പിക്കുകയായിരുന്നു. എട്ട് വിദ്യാര്ഥിനികളാണ് ഇയാള്ക്കെതിരെ പരാതി സമര്പ്പിച്ചിരിക്കുന്നത്. അബേലിനെതിരെ കൂടുതല് എഫ്ഐആറുകള് തയ്യാറാക്കണമെന്നും ജാമ്യം ലഭിക്കാത്ത വകുപ്പുകള് ചുമത്തണമെന്നുമാണ് പ്രതിഷേധിക്കുന്ന വിദ്യാര്ഥികളുടെ ആവശ്യം. വിദ്യാര്ത്ഥികള്ക്ക് പിന്തുണയുമായി വിദ്യാര്ത്ഥി സംഘടനകളും നാട്ടുകാരും രാത്രി പൊലീസ് സ്റ്റേഷനില് എത്തിയിട്ടുണ്ട്.
