മഹത്തായ ഒരു സിനിമാ പ്രോജക്റ്റിന്റെ ഭാഗമാകാൻ കഴിഞ്ഞതിന്റെ സന്തോഷവും അനുഭവങ്ങളും പങ്കുവെച്ച് കന്നഡ സൂപ്പർ താരം യഷ്. റിലീസിനൊരുങ്ങുന്ന ‘രാമായണം – പാർട്ട് 1’ ചിത്രത്തിന്റെ നിർമ്മാതാവായ നമിത് മൽഹോത്രയ്ക്ക് നന്ദി പറഞ്ഞുകൊണ്ടാണ് യഷ് തന്റെ വാക്കുകൾ ആരംഭിച്ചത്. “ഇത്രയും മികച്ചൊരു അവസരം എനിക്ക് നൽകിയതിന് നന്ദി. ഈ അത്ഭുതകരമായ പ്രോജക്റ്റിന്റെ ഭാഗമാകാൻ കഴിഞ്ഞതിൽ ഞാൻ അതീവ സന്തുഷ്ടനാണ്. ഈ പ്രോജക്റ്റിനെ ഇത്രയും വലിയൊരു തലത്തിലേക്ക് എത്തിച്ചതിന്റെ പൂർണ്ണ ക്രെഡിറ്റും നമിത് മൽഹോത്രയ്ക്കാണ്. ഈ കഥാപാത്രത്തെ അവതരിപ്പിക്കാൻ അദ്ദേഹം എന്നെ അനുവദിച്ചു. മാത്രവുമല്ല, ഇതിലൂടെ എനിക്ക് ഹിന്ദി ഭാഷ പഠിക്കാനുള്ള ഒരു അവസരവും ലഭിച്ചു,” യഷ് പറഞ്ഞു.
ശ്രീരാമന്റെ കഥ അന്താരാഷ്ട്ര തലത്തിൽ എത്തിക്കുക എന്ന വലിയൊരു സ്വപ്നമാണ് ചിത്രത്തിന് പിന്നിൽ പ്രവർത്തിക്കുന്ന മുഴുവൻ ടീമും പങ്കിടുന്നതെന്നും അദ്ദേഹം വ്യക്തമാക്കി. “ഞങ്ങളെല്ലാവരും ഒത്തുചേർന്നിരിക്കുകയാണ്. ഈ സിനിമയുടെ ഭാഗമായ ഓരോരുത്തരും ഒരൊറ്റ കാഴ്ചപ്പാടോടും ദൃഢനിശ്ചയത്തോടും കൂടിയാണ് ഇതിലേക്ക് വന്നത് – നമ്മുടെ കഥയെ ആഗോള പ്ലാറ്റ്ഫോമിൽ എത്തിക്കുക എന്നത് മാത്രമാണ് ആ ലക്ഷ്യം. അതുകൊണ്ട് തന്നെ ഞങ്ങളുടെ വ്യക്തിപരമായ താൽപ്പര്യങ്ങളെല്ലാം മാറ്റിവെച്ചാണ് ഞങ്ങൾ ഇവിടെ നിൽക്കുന്നത്. ശ്രീരാമന്റെ കഥ ആഗോള പ്രേക്ഷകരിലേക്ക് എത്തിക്കുക, ഒപ്പം നമ്മുടെ രാജ്യത്ത് അത് ആഘോഷമാക്കുക എന്ന ഒരൊറ്റ താൽപ്പര്യം മാത്രമേ ഞങ്ങൾക്കുള്ളൂ,” താരം കൂട്ടിച്ചേർത്തു.
നിർമ്മാതാവ് നമിത് മൽഹോത്രയുടെ ധൈര്യത്തെയും പ്രതിബദ്ധതയെയും യഷ് പ്രശംസിച്ചു. കൂടാതെ, കഥാപാത്രത്തിന്റെ സൂക്ഷ്മമായ വശങ്ങൾ മനസ്സിലാക്കാൻ തന്നെ സഹായിക്കുകയും നയിക്കുകയും ചെയ്ത സംവിധായകൻ നിതേഷ് തിവാരിക്കും താരം പ്രത്യേകം നന്ദി അറിയിച്ചു.
നമിത് മൽഹോത്രയുടെ നിർമ്മാണത്തിൽ ഒരുങ്ങുന്ന ബ്രഹ്മാണ്ഡ ചലച്ചിത്രം ‘രാമായണ’ത്തിന്റെ ട്രെയിലർ റിലീസ് തീയതി ഇതിനകം പ്രഖ്യാപിച്ചിട്ടുണ്ട്. ലോകമെമ്പാടുമുള്ള കാത്തിരിപ്പിന് വിരാമമിട്ട് 2026 ജൂലൈ 24-നാണ് ചിത്രത്തിന്റെ ഔദ്യോഗിക ട്രെയിലർ പുറത്തിറങ്ങുന്നത്. ഇതിന് മുന്നോടിയായി, ചിത്രത്തിന്റെ ആഗോള പ്രയാണത്തിന് തുടക്കം കുറിച്ചുകൊണ്ടുള്ള ‘പ്രഥം സങ്കൽപ്’ ചടങ്ങും ട്രെയിലറിന്റെ പ്രത്യേക പ്രിവ്യൂവും ന്യൂഡൽഹിയിൽ വെച്ച് നടന്ന ചടങ്ങിലാണ് യഷ് ഈ വാക്കുകള് പറയുകയുണ്ടായത്. നിതേഷ് തിവാരി സംവിധാനം ചെയ്യുന്ന ‘രാമായണം: പാർട്ട് 1’ 2026 ദീപാവലി റിലീസായി തിയേറ്ററുകളിലെത്തും. പിആർഒ: ആതിര ദിൽജിത്ത്.
