ന്യൂയോര്ക്ക്: ലോകകപ്പില് സ്പെയിനിന്റെ കിരീട നേട്ടം ഒരു സുപ്രഭാതത്തില് സംഭവിച്ചതല്ല. 2010നു ശേഷം ലോകകിരീടം നേടാന് സാധിക്കാതിരുന്ന അവര് കഴിഞ്ഞ കുറെ വര്ഷങ്ങളില് ചെയ്ത കഠിനാധ്വാനത്തിന്റെ ഫലമാണ് ഈ ജയം. 2026 ലോകകപ്പ് കിരീടം ഉയര്ത്തിയതോടെ സ്പാനിഷ് ഫുട്ബോള് ഒരു പുതിയ ചരിത്രം കുറിച്ചു. 2010-ല് ലോകകപ്പും 2008-ല് യൂറോ കിരീടവും നേടിയ സ്വര്ണതലമുറയ്ക്ക് ശേഷം, 2024 യൂറോയും 2026 ലോകകപ്പും നേടി പുതിയ തലമുറയും അതേ നേട്ടം ആവര്ത്തിച്ചിരിക്കുകയാണ്. എന്നാല് ഇതിലും വലിയ കഥ മറ്റൊന്നാണ്. കഴിഞ്ഞ അഞ്ച് വര്ഷത്തിനിടെ പുരുഷ-വനിതാ വിഭാഗങ്ങളിലായി സീനിയര് മുതല് അണ്ടര്-17 വരെ സ്പെയിന് ആകെ 16 അന്താരാഷ്ട്ര കിരീടങ്ങള് സ്വന്തമാക്കി.
എന്താണ് രഹസ്യം
സ്പാനിഷ് ഫുട്ബോള് നിരീക്ഷകന് ഗിയേം ബാലഗെയുടെ അഭിപ്രായത്തില് ഇത് യാദൃച്ഛികമല്ല. വര്ഷങ്ങളായി ഒരേ ഫുട്ബോള് തത്വം പിന്തുടരുന്നതിന്റെ ഫലമാണ്. എല്ലാ പ്രായവിഭാഗങ്ങളിലും ഒരേ രീതിയിലുള്ള പരിശീലനം, സാങ്കേതിക മികവിന് നല്കുന്ന പ്രാധാന്യം, പന്ത് കൈവശം വെച്ച് കളി നിയന്ത്രിക്കുന്ന ശൈലി എന്നിവയാണ് ഈ വിജയങ്ങളുടെ അടിത്തറ.
ഡി ലാ ഫുവെന്റെ എന്ന വിജയശില്പി
2022 ഡിസംബറില് ലൂയിസ് ഡി ലാ ഫുവെന്റെ സ്പെയിന് പരിശീലകനായി ചുമതലയേറ്റപ്പോള് പലരും സംശയത്തോടെയാണ് അദ്ദേഹത്തെ കണ്ടത്. എന്നാല് വെറും നാല് വര്ഷത്തിനുള്ളില് അദ്ദേഹം സ്പെയിനിന് മൂന്ന് പ്രധാന കിരീടങ്ങള് സമ്മാനിച്ചു.
2023 യുവേഫ നേഷന്സ് ലീഗ്
2024 യൂറോ കപ്പ്
2026 ഫിഫ ലോകകപ്പ്
യുവ ടീമുകളില് വര്ഷങ്ങളോളം പ്രവര്ത്തിച്ച അനുഭവം അദ്ദേഹത്തിന് വലിയ ശക്തിയായി. അതുകൊണ്ടുതന്നെ അണ്ടര്-21 ടീമില് പരിശീലിപ്പിച്ച പല താരങ്ങളെയും പിന്നീട് സീനിയര് ടീമില് എത്തിച്ച് വിജയത്തിലേക്ക് നയിക്കാന് അദ്ദേഹത്തിന് സാധിച്ചു.
സൂപ്പര് താരങ്ങളല്ല, സൂപ്പര് ടീം
ലാമിന് യമാല്, റോഡ്രി, പെഡ്രി, നിക്കോ വില്യംസ് തുടങ്ങിയ ലോകോത്തര താരങ്ങള് ടീമിലുണ്ടെങ്കിലും സ്പെയിനിന്റെ യഥാര്ത്ഥ ശക്തി വ്യക്തിഗത മികവിലല്ല, കൂട്ടായ്മയിലാണ്. ഓരോ താരവും ഒരേ ഫുട്ബോള് തത്വം പിന്തുടരുന്നു. പന്ത് കൈവശംവയ്ക്കക്കല്, ഇടങ്ങള് സൃഷ്ടിക്കല്, ഉയര്ന്ന പ്രെസിങ്, കൃത്യമായ പാസിങ് എന്നിവയാണ് അവരുടെ മുഖമുദ്ര. ലോകകപ്പ് ഫൈനലില് അര്ജന്റീനയെക്കാള് വളരെ കൂടുതല് അവസരങ്ങള് സൃഷ്ടിച്ചാണ് സ്പെയിന് വിജയം പിടിച്ചെടുത്തത്.
ഭാവിയും സ്പെയിന്?
ലാമിന് യമാല്, പൗ കുബാര്സി, പെഡ്രി, ഗാവി, നിക്കോ വില്യംസ് തുടങ്ങി ഇരുപതില് താഴെയോ ഇരുപതുകളുടെ തുടക്കത്തിലോ ഉള്ള താരങ്ങളാണ് ഈ ടീമിന്റെ നട്ടെല്ല്. അതിനാല് ഈ ആധിപത്യം അടുത്ത വര്ഷങ്ങളിലും തുടരാന് സാധ്യതയുണ്ട്. ശക്തമായ യുവതാര വികസന സംവിധാനവും വ്യക്തമായ ഫുട്ബോള് തത്വവും നിലനില്ക്കുന്നിടത്തോളം സ്പെയിനെ മറികടക്കുക മറ്റ് രാജ്യങ്ങള്ക്ക് എളുപ്പമാകില്ല.
16 കിരീടങ്ങള്!
പുരുഷ ഫുട്ബോള് (5 കിരീടങ്ങള്)
2023 യുവേഫ നേഷന്സ് ലീഗ്
2024 യൂറോ കപ്പ്
2024 ഒളിമ്പിക് സ്വര്ണം (അണ്ടര്-23)
2026 അണ്ടര്-19 യൂറോപ്യന് ചാമ്പ്യന്ഷിപ്പ്
2026 ഫിഫ ലോകകപ്പ്
വനിതാ ഫുട്ബോള് (11 കിരീടങ്ങള്)
2023 വനിതാ ലോകകപ്പ്
2024, 2025 യുവേഫ വനിതാ നേഷന്സ് ലീഗ്
2022 അണ്ടര്-20 വനിതാ ലോകകപ്പ്
2022, 2023, 2024, 2025, 2026 അണ്ടര്-19 യൂറോപ്യന് ചാമ്പ്യന്ഷിപ്പ്
2022 അണ്ടര്-17 വനിതാ ലോകകപ്പ്
2024 അണ്ടര്-17 യൂറോപ്യന് ചാമ്പ്യന്ഷിപ്പ്
