ന്യൂദല്ഹി: സിജെപിയുടെ നിയന്ത്രണം മറ്റാരൊക്കെയോ പിടിച്ചെടുക്കുന്നതായി സംശയം. സമരം നിര്ത്തിയെന്ന് പറഞ്ഞ് ചില സിജെപി നേതാക്കള് പിന്വാങ്ങിയെങ്കിലും മറ്റ് ചിലര് വീണ്ടും ജന്തര്മന്തറില് തിങ്കളാഴ്ച രാത്രിയെത്തി സമരം തുടരുകയാണ്. സിജെപി സമരത്തിന്റെ പേരില് ഒരു തരം അരാജകത്വമാണ് നടമാടുന്നത്. മാത്രമല്ല, സിപിഎം, കോണ്ഗ്രസ്, ആം ആദ്മി ഉള്പ്പെടെയുള്ള പാര്ട്ടിയുടെ പ്രവര്ത്തകരും ഈ സമരത്തിലേക്ക് നുഴഞ്ഞു കയറിയിട്ടുണ്ട്. ജിഹാദി സംഘങ്ങളും നുഴഞ്ഞുകയറ്റം നടത്തിയിട്ടുണ്ടെന്ന് പറയുന്നു.
പൊലീസ് പൊളിച്ചുനീക്കിയ പന്തല് വീണ്ടും കെട്ടിയാണ് ഇവരുടെ സമരം. രാവിലെ പാര്ലമെന്റിലേക്ക് സമരം നടത്തിയ സിജെപി പ്രവര്ത്തകര്ക്ക് നേരെ പൊലീസ് ലാത്തി വീശി. കാരണം അനുമതി വാങ്ങാതെയായിരുന്നു ഇവരുടെ സമരം. പാര്ലമെന്റ് മാര്ച്ച് പാടില്ലെന്ന് പൊലീസ് അറിയിച്ചിട്ടും ഇവര് പാര്ലമെന്റിലേക്ക് മാര്ച്ച് നടത്തുകയായിരുന്നു.
ഇതിനിടെ സമരത്തില് ചില സാമൂഹ്യ വിരുദ്ധ ശക്തികള് നുഴഞ്ഞുകയറിയിരുന്നു. ഇവര് പലയിടത്തും പൊലീസിന് നേരെ കല്ലെറിയാന് ചാക്കില് കല്ല് കൊണ്ടുവന്നിരുന്നു. ഒരു ട്രക്കിലും സമരക്കാര് കല്ലെത്തിച്ചിരുന്നു. എന്തായാലും പൊലീസ് കുറെപ്പേരെ അറസ്റ്റ് ചെയ്ത് നീക്കി. മാറാത്തവരെ ലാത്തിച്ചാര്ജ്ജു ചെയ്തു. കണ്ണീര് വാതകവും പ്രയോഗിച്ചു. ഏതാനും വിദ്യാര്ത്ഥികള്ക്ക് പരിക്കുണ്ട്.
സോനം വാങ്ചുക് നിരാഹാരം അവസാനിപ്പിച്ചിട്ടുണ്ട്. താനും നിരാഹാരം നിര്ത്തിയതായി അഭിജിത് ദീപ്കെ അറിയിച്ചിരുന്നു. അതിനിടയിലാണ് വീണ്ടും ചിലര് സമരപ്പന്തല് കെട്ടി സമരം തുടരുന്നത്.
