തിരുവനന്തപുരം: ഗവണ്‍മെന്റ് പ്ലീഡര്‍ നിയമനത്തില്‍ കെഎസ്യു സംസ്ഥാന അധ്യക്ഷന്‍ അലോക്ഷ്യസ് സേവിയര്‍ എതിര്‍പ്പ് അറിയിച്ചെങ്കിലും മുഖ്യമന്ത്രി തള്ളി. ജിയോണ ജെയിംസിനെ മാറ്റണമെന്ന ആവശ്യം സെക്രട്ടേറിയറ്റിലെ കൂടിക്കാഴ്ചയില്‍ ഉന്നയിച്ചെങ്കിലും മുഖ്യമന്ത്രി അംഗീകരിച്ചില്ല.
ജിയോണ ജെയിംസിന്റെ പശ്ചാത്തലം എസ്എഫ്ഐ ആണ്. ആ കുട്ടി ലോ കോളജില്‍ എസ്എഫ്ഐക്കാരിയായിരുന്നു. അതിന് ശേഷവും ഇടതുപക്ഷ അനുകൂല രീതിയിലാണ് അവര്‍ നിന്നത്. അതിലൊരു തീരുമാനമെടുക്കേണ്ടത് സര്‍ക്കാരാണ്. സര്‍ക്കാരിനെയും പാര്‍ട്ടിയെയും വിശ്വാസമുണ്ട് -അലോക്ഷ്യസ് സേവിയര്‍ മുഖ്യമന്ത്രിയെ കണ്ട ശേഷം മാധ്യമങ്ങളോട് പറഞ്ഞു.
ഇത് ഞങ്ങളുടെ സര്‍ക്കാരാണ്. ഞങ്ങളുടെ മുഖ്യമന്ത്രിയാണ്. വിഷയത്തില്‍ മുഴുവന്‍ കാര്യങ്ങളും മുഖ്യമന്ത്രിക്ക് മുന്നിലുണ്ട്. സര്‍ക്കാരിന്റെ ഭാഗത്ത് നിന്ന് കെഎസ്യുവിന്റെ താത്പര്യം ഉള്‍ക്കൊള്ളുന്ന തീരുമാനമുണ്ടാകുമെന്നാണ് പ്രതീക്ഷ. പറയാനുള്ള മുഴുവന്‍ കാര്യങ്ങളും മുഖ്യമന്ത്രി കേട്ടു. തീരുമാനം സര്‍ക്കാരെടുക്കും. സര്‍ക്കാരിനെതിരെ കെഎസ്യു തുറന്ന പോരിലേക്ക് എന്നുള്ള ടാഗ് ലൈനിലേക്കൊന്നും പോകേണ്ട കാര്യമില്ലെന്ന് അലോഷ്യസ് സേവ്യര്‍ വ്യക്തമാക്കി.
