തിരുവനന്തപുരം: കെ എസ് യു സംസ്ഥാന പ്രസിഡന്റ് അലോഷ്യസ് സേവ്യറിനെ കാണാന്‍ മുഖ്യമന്ത്രി വിഡി സതീശന്‍ സമയം അനുവദിച്ചു. തിങ്ക്‌ളാഴ്ചയോ ചൊവ്വാഴ്ചയോ തിരുവനന്തപുരത്ത് മുഖ്യമന്ത്രിയുടെ ഓഫീസില്‍ വച്ച് കാണാം എന്നാണ് അറിയിച്ചത്. ഗവണ്‍മെന്റ് പ്ലീഡര്‍മാരുടെ നിയമനത്തില്‍ കെ എസ് യു ആക്ഷേപം ഉന്നയിച്ചതോടെ വിവാദമുണ്ടായിരുന്നു.
പ്ലീഡര്‍ നിയമന വിഷയം മുന്നണിക്കുള്ളില്‍ അഭിപ്രായ വ്യത്യാസങ്ങള്‍ക്ക് കാരണമായതോടെ ഇന്ന് കെപിസിസി നേതൃത്വത്തിന്റെ ഇടപെടലടക്കം ഉണ്ടായിരുന്നു. വിഷയത്തില്‍ പരസ്യ പ്രതികരണം നടത്തി വിഷയം സങ്കീര്‍ണം ആക്കരുതെന്ന് കെപിസിസി നേതൃത്വം പ്രവര്‍ത്തകര്‍ക്ക് നിര്‍ദ്ദേശം നല്‍കിയിരുന്നു. പാര്‍ട്ടി വക്താക്കള്‍ കൃത്യമായ മാര്‍ഗനിര്‍ദേശങ്ങള്‍ പാലിക്കണമെന്നും ആവശ്യപ്പെട്ടു. വിമര്‍ശനങ്ങള്‍ പാര്‍ട്ടിക്കുള്ളില്‍ മാത്രമായിരിക്കണം.നിലവില്‍ ഉണ്ടായിട്ടുള്ള പ്രശ്‌നങ്ങള്‍ പരിഹരിക്കാന്‍ നേതൃത്വം ഇടപെടുമെന്നും പ്രവര്‍ത്തകര്‍ക്ക് ഉറപ്പ് നല്‍കിയിരുന്നു.
