ശാരീരികാരോഗ്യ സൗഖ്യമാം സമ്പത്ത്
നേരുന്ന സദ്ഫലമാണു ചക്ക
സര്വഭാഗങ്ങളും സദ്ഗുണം പേറുന്ന
സംസ്ഥാന ഫലമിന്നു ചക്ക തന്നെ.
വേണമെങ്കില് ചക്ക വേരിലും കായ്ചിടും
ചക്ക വീണു മുയല് ചത്തുപോകാം
ചക്കയിലീച്ച പൊതിഞ്ഞപോലെയെന്നും
എത്രയോ ചക്ക പഴഞ്ചൊല്ലുകള്
ഇടിയന് ഇടത്തരം ചക്ക പഴുക്കാന്
തുടങ്ങുന്ന ചക്ക പഴുത്ത ചക്ക
ചക്ക വരിയ്ക്ക കുഴച്ചക്കയെന്നിങ്ങനെ
വെയ്ക്കാന് വറുക്കാനിനങ്ങള് വേറെ
ചക്കപ്പുഴുക്കെരിയച്ചാര് തോരന്
ചക്കവരട്ടി കൊണ്ടാട്ടമോലന്
ചക്കപ്രഥമനുണ്ടടയുണ്ട് സോസുണ്ട്
ചക്ക ഹല്വ ചക്കദോശപുട്ട്
ചക്കപ്പഴം നൂറുഗ്രാമെടുത്താലതില്
തൊണ്ണൂറ്റിയെട്ടു കലോറിയൂര്ജ്ജം
അന്നജം നാരും കൊഴുപ്പിന്റെ അംശവും
പ്രോട്ടീന് ജലം കൂടെ ജീവകങ്ങള്
പാല് ചേര്ത്തരയ്ക്കുന്ന ചക്കക്കുരുവിനാല്
ത്വക്കു നന്നാക്കാം മുഖം മിനുക്കാം
രോഗപ്രതിരോധശേഷിയാര്ജിച്ചിടും
രക്തശ്വേതാണുക്കള് ശക്തരാകും
കുരുവിലെ പ്രോട്ടീനുമജ്ജീവകങ്ങളും
തലമുടിക്കഴകും കരുത്തുമേകും
സന്താനസൗഭഗം സമ്മാനമായ് തരും
ക്യാന്സര് ചെറുക്കും വിളര്ച്ചയാറ്റും
വിപണിയില് പ്രിയമുള്ള വിഭവമായ് മാറ്റിടാം
ചക്കമുള്ളൗഷധമാക്കി മാറ്റാം
വര്ഷകാലച്ചക്ക നല്ലതല്ലാ, ചുക്ക്
നല്ലതല്ലോ ചക്ക തിന്ന ശേഷം
വാതവും പിത്തവും കഫവും ശമിക്കുവാന്
ചക്കപോലില്ല മരുന്ന് വേറെ
പോഷണം കൂട്ടുവാന് ക്ഷീണം കുറയ്ക്കുവാന്
ഉത്തമോത്തേജകം ചക്ക തന്നെ
ദേശീയ ഫലമായ് വളര്ത്തുന്നു ചക്കയെ
ശ്രീലങ്കയും പിന്നെ ബംഗ്ലാദേശും
ആര്ട്ടോ കാര്പസ് ഹെറ്റെറോഫിലസാം ചക്ക
സംസ്ഥാനഫലമാണു തമിഴ്നാട്ടിലും
ജന്മഭൂമി ഓണ്ലൈന്