കൊച്ചി: സംസ്ഥാനത്ത് ആദ്യമായി ആയിരത്തിലധികം പാലിയേറ്റീവ് സന്നദ്ധസേവകരെ ഒരേ വേദിയില് അണിനിരത്തി സുകൃതസംഗമം ഇന്ന് കൊച്ചിയില് നടക്കും. എളമക്കര ഭാസ്കരീയം കണ്വെന്ഷന് സെന്ററി ല് രാവിലെ 10.30ന് മുന് ഡിജിപി ഡോ. ജേക്കബ് തോമസ് ഉദ്ഘാടനം ചെയ്യും.
ദേശീയ സേവാഭാരതി പ്രസിഡന്റ് ഡോ. രഞ്ജിത് വിജയഹരി അധ്യക്ഷത വഹിക്കും. അമൃത സ്കൂള് ഓഫ് മെഡിസിന് പ്രിന്സിപ്പല് ഡോ. ഗിരീഷ് കുമാര് കെ.പി. മുഖ്യാതിഥിയായിരിക്കും. പാലിയേറ്റീവ് ട്രെയിനര് ജോസ് പുളിമൂട്ടിലിനെ ചടങ്ങില് ആദരിക്കും. ഡോ. ശ്രീരാം ശങ്കര്, സീതാ ശങ്കര്, പി.എന്. രവികുമാര്, സീമാജാഗരണ് മഞ്ച് ദേശീയ സംരക്ഷക് എ. ഗോപാലകൃഷ്ണന്, എം. രാജീവന് എന്നിവര് സംസാരിക്കും.
11.45 നുള്ള സമ്മേളനത്തില് എറണാകുളം മെഡിക്കല് ട്രസ്റ്റ് ആശുപത്രി ജെറിയാട്രിക്സ് വിഭാഗം മേധാവി ഡോ. ജിനോ ജോയി അധ്യക്ഷത വഹിക്കും. ഡോ. ബി. രാജീവ്, ഡോ. ജോസ് പുളിമൂട്ടില്, ഡോ. രാജശ്രീ കെ.സി. എന്നിവര് സംസാരിക്കും. ഉച്ചതിരിഞ്ഞ് രണ്ടിനുള്ള സമ്മേളനത്തില് എം. രാജീവന്, സീത ശങ്കര്, അര്ച്ചന, അശ്വന്ത് എന്നിവര് പങ്കെടുക്കും. 2.45ന് സമാപന സമ്മേളനത്തില് സീമാ ജാഗരണ്മഞ്ച് ദേശീയ സംരക്ഷക് എ. ഗോപാലകൃഷ്ണന് സന്ദേശം നല്കും.
ദേശീയ സേവാഭാരതിയുടെ പ്രധാന ആരോഗ്യരക്ഷാപദ്ധതിയായ സുകൃതം സാന്ത്വന വയോജന പരിചരണ പദ്ധതി നൂറിലധികം കേന്ദ്രങ്ങളില് പ്രവര്ത്തിച്ചുവരുന്നുണ്ട്. ഈ കേന്ദ്രങ്ങളില് അഹോരാത്രം സേവനമനുഷ്ഠിക്കുന്ന സന്നദ്ധപ്രവര്ത്തകര്, ഡോക്ടര്മാര്, നഴ്സുമാര്, കോഓര്ഡിനേറ്റര്മാര് എന്നിവരെ ആദരിക്കാനും അവര്ക്ക് ആവശ്യമായ മാര്ഗനിര്ദേശങ്ങളും ആവേശംപകരാനുമാണ് സംഗമം സംഘടിപ്പിക്കുന്നതെന്ന് ഭാരവാഹികള് പറഞ്ഞു. പുതുതായി ആരംഭിക്കാന് പോകുന്ന യൂണിറ്റുകളുടെ പ്രതിനിധികളും സംഗമത്തില് പങ്കാളികളാകും.
