ഇടുക്കി : സര്ക്കാര് പ്ലീഡര് ആയി എസ് എഫ് ഐ മുന് പ്രവര്ത്തക ജിയോണ ജയിംസിനെ ശുപാര്ശ ചെയ്തെന്ന് സമ്മതിച്ച് ഡീന് കുര്യാക്കോസ് എംപി. യോഗ്യത പരിഗണിച്ചാണ് നിയമനം. 100 ശതമാനം ബോധ്യമുള്ളത് കൊണ്ടാണ് എം പി എന്ന നിലയില് ശുപാര്ശ ചെയ്തതെന്നും ഡീന് കുര്യക്കോസ് എംപി പറഞ്ഞു. പ്ലീഡര് നിയമനം വിവാദമാവുകയും മുഖ്യമന്ത്രി വി ഡി സതീശനെതിരെ വിമര്ശനം ഉയരുകയും ചെയ്ത സാഹചര്യത്തില് ആണ് ഡീന് കുര്യാക്കോസിന്റെ വെളിപ്പെടുത്തല്.
ജിയോണയെ പരിചയം ഉണ്ടെന്നും അഭിഭാഷക എന്ന നിലയില് ആണ് ശുപാര്ശ ചെയ്തതെന്നും ഡീന് കുര്യാക്കോസ് പറഞ്ഞു.2022 മുതല് ലോയേഴ്സ് കോണ്ഗ്രസ് പ്രവര്ത്തകയാണ് ജിയോണ. പിണറായി വിജയന് കേരളം ഭരിക്കുമ്പോള് ജിയോണ ലോയേഴ്സ് കോണ്ഗ്രസിലുണ്ട്.
കോണ്ഗ്രസില് എപ്പോള് എത്തി എന്നത് നോക്കേണ്ട കാര്യമില്ല. സന്ദീപ് വാര്യര് പാര്ട്ടിയില് വന്നപ്പോള് ആരെങ്കിലും എതിര്ത്തോ? യുഡിഎഫിനൊപ്പം നിന്നാല് ആരായാലും അംഗീകരിക്കുമെന്ന് ഡീന് കുര്യാക്കോസ് എം പി പറഞ്ഞു.
അതേസമയം, കെ എസ് യു സംസ്ഥാന അധ്യക്ഷന് അലോഷ്യസ് സേവിയര് പ്ലീഡര് നിയമനത്തെ എതിര്ത്തതിലും മുഖ്യമന്ത്രിയുമായി ഉണ്ടായ പ്രശ്നങ്ങളിലും ഇടപെടാന് ഇല്ലെന്ന് എം പി പറഞ്ഞു.അലോഷ്യസ് അലോഷ്യസിന്റെ നിലപാട് പറയട്ടെ .താന് പറഞ്ഞത് തന്റെ നിലപാട് മാത്രമാണ്. ഒരു യുവ എം പി ആണ് പ്ലീഡര് നിയമന ശുപാര്ശ നല്കിയതെന്ന് കെ ബാബു പറഞ്ഞത് വിവാദം ആക്കേണ്ടതില്ല. ഒളിച്ചുവെക്കേണ്ട കാര്യമല്ല അത്. കെ ബാബുവുമായി സംസാരിച്ചു.
കെ ബാബുവിന് തന്റെ പേര് കൂടി പറയാമായിരുന്നു. അലോഷ്യസ് സേവ്യറിന്റേത് അജണ്ടയാണോ എന്ന ചോദ്യത്തിന്, അജണ്ട ആക്കുന്നവര് ആക്കിക്കൊള്ളട്ടെ, ഇതേ സ്ഥാനത്ത് താന് ആയിരുന്നെങ്കില് ഇങ്ങനെ ആയിരിക്കില്ല പ്രതികരിക്കുകയെന്നും ഡീന് കുര്യാക്കോസ് പറഞ്ഞു.
