ആലപ്പുഴ: ലോകത്തിലെ ഏറ്റവും മികച്ച വികസന മാതൃകകളിലൊന്നായി യുഎഇയെ ഉയര്ത്തിയ ഭരണത്തിന് നേതൃത്വം നല്കുന്ന ദുബായ് ഭരണാധികാരിയും യുഎഇ വൈസ് പ്രസിഡന്റും പ്രധാനമന്ത്രിയുമായ ഷെയ്ഖ് മുഹമ്മദ് ബിന് റാഷിദ് അല് മക്തൂമിന് ജന്മദിനാശംസകള് നേര്ന്ന് എസ്എന്ഡിപി യോഗം ജനറല് സെക്രട്ടറി പത്മഭൂഷണ് വെള്ളാപ്പള്ളി നടേശന്. പത്മഭൂഷന് ബഹുമതിക്ക് അര്ഹനായ വെള്ളാപ്പള്ളി നടേശനെ യുഎഇയിലെ എസ്എന്ഡിപി ഭാരവാഹികള് അനുമോദിച്ചതിനെ തുടര്ന്ന് സംസാരിക്കുകയായിരുന്നു അദ്ദേഹം.
മനുഷ്യരെ ചേര്ത്തുപിടിക്കുന്ന സംസ്കാരമാണ് ഒരു രാജ്യത്തിന്റെ ഏറ്റവും വലിയ ശക്തി. ആ മഹത്തായ സന്ദേശം ഭരണത്തിലൂടെ ലോകത്തിന് കാണിച്ചുതന്ന രാജ്യമാണ് യുഎഇ. ഭാരതവും യുഎഇയും തമ്മിലുള്ള ആത്മബന്ധവും സൗഹൃദവും കാലക്രമേണ കൂടുതല് ശക്തിപ്പെട്ടിരിക്കുകയാണ്. ഇരുരാജ്യങ്ങളുടെയും നേതൃത്വങ്ങള് പരസ്പര വിശ്വാസത്തോടെയും ബഹുമാനത്തോടെയും മുന്നോട്ട് പോകുന്നത് അഭിമാനകരമാണെന്ന് അദ്ദേഹം പറഞ്ഞു. വെള്ളാപ്പള്ളി നടേശനെ യുഎഇയിലെ എസ്എന്ഡിപി യോഗം ഭാരവാഹികള് കണിച്ചുകുളങ്ങരയിലെ വസതിയിലെത്തിയാണ് അനുമോദിച്ചത്. എസ്എന്ഡിപി യോഗം യുഎഇ കോ ഓര്ഡിനേറ്ററും പന്തളം യൂണിയന് പ്രസിഡന്റുമായ അഡ്വ. സിനില് മുണ്ടപ്പള്ളി, അബുദാബി യൂണിയന് കണ്വീനര് ചാറ്റര്ജി കായംകുളം, ഷാര്ജ യൂണിയന് കൗണ്സിലര് കലേഷ്, യുഎഇ മുന് സെന്ട്രല് കമ്മിറ്റി സെക്രട്ടറി ശ്രീധരന് പ്രസാദ് തുടങ്ങിയവര് പങ്കെടുത്തു.
