ന്യൂദല്ഹി: പ്രായമായവരോ മാരകരോഗികളോ ആയ തടവുകാരെ ശിക്ഷാ കാലാവധിക്കു മുന്പ് മോചിപ്പിക്കുന്നതിനുള്ള സമഗ്ര നയം മൂന്ന് മാസത്തിനുള്ളില് രൂപീകരിക്കണമെന്ന് സുപ്രീം കോടതി എല്ലാ സംസ്ഥാനങ്ങളോടും നിര്ദ്ദേശിച്ചു . മാരകരോഗികളെയും 70 വയസ്സിനു മുകളിലുള്ളവരെയും കാരുണ്യപൂര്വ്വം മോചിപ്പിക്കുന്നതിന് രാജ്യവ്യാപകമായ മാര്ഗ്ഗനിര്ദ്ദേശങ്ങള് ആവശ്യപ്പെട്ട് സമര്പ്പിച്ച ഹര്ജിയിലാണ് കോടതി നിര്ദ്ദേശം.
അര്ഹരായ തടവുകാരെ തിരിച്ചറിയുന്നതിനും ഏകോപനം ഉറപ്പാക്കുന്നതിനും അതത് സംസ്ഥാന നിയമ സേവന അധികാരികളുമായി കൂടിയാലോചിച്ച് നയം രൂപീകരിക്കണമെന്നാണ് ജസ്റ്റിസുമാരായ വിക്രം നാഥും സന്ദീപ് മേത്തയും അടങ്ങുന്ന ബെഞ്ച് നിര്ദേശിച്ചത്.
തടവുകാര് അവസാന കാലം വരെ ജയിലില് കഴിയാന് ഇടയാക്കുന്ന നടപടിക്രമങ്ങളിലെ കാലതാമസം ഒഴിവാക്കണം. എന്നാല് എല്ലാ തീരുമാനങ്ങളും ജുഡീഷ്യല് അവലോകനത്തിന് വിധേയമായിരിക്കുമെന്നും കോടതി വ്യക്തമാക്കി.
