ഡാളസ്: സെമിയില് സ്പെയിനോടേറ്റ പരാജയത്തോടെ ലോകകപ്പില് നിന്ന് പുറത്തായ ഫ്രാന്സ് ടീം പരിശീലകന് ദിദിയെ ദെഷാംപ്സ് സ്ഥാനമൊഴിയും. പകരം ഇതിഹാസ താരവും റയല് മാഡ്രിഡ് മുന് പരിശീലകനുമായ സിനദിന് സിദാന് ഫ്രഞ്ച് ടീം കോച്ചാകും.
ഈ ലോകകപ്പ് കഴിയുന്നതോടെ ഫ്രഞ്ച് ടീം ചുതമല ഒഴിയുമെന്ന് ഫ്രഞ്ച് പരിശീലകന് ദെഷാംപ്സ് നേരത്തെ തന്നെ അറിയിച്ചിരുന്നു. സ്പെയിനില് തോറ്റ ടീമിന് ഇനി മൂന്നാം സ്ഥാനക്കാര്ക്ക് വേണ്ടിയുള്ള ലൂസേഴ്സ് ഫൈനല് കൂടി അവശേഷിക്കുന്നുണ്ട്. ഈ മത്സരത്തോടെ ഒന്നര പതിറ്റാണ്ടിനോടടുത്ത ഫ്രഞ്ച് ടീം പരിശീലക സ്ഥാനത്ത് നിന്ന് ദെഷാംപ്സ് സ്ഥാനമൊഴിയും. 2012ലാണ് അദ്ദേഹം ഫ്രഞ്ച് പരിശീലകനായെത്തിയത്. 2018ല് ദേശീയ ടീമിന് രണ്ടാം ലോക കിരീടം നേടിക്കൊടുത്ത ദെഷാംപ്സ് കഴിഞ്ഞ വര്ഷം ടീമിനെ ഫൈനലിലെത്തിച്ചു. ഇക്കൊല്ലമടക്കം തുടര്ച്ചയായി മൂന്ന് ലോകകപ്പുകളില് ഫ്രഞ്ച് ടീമിനെ സെമിയിലെത്തിക്കാനും ഫ്രാന്സിന്റെ മുന് നായകന് കൂടിയായ ദെഷാംപ്സിന് സാധിച്ചു. 2016 യൂറോകപ്പില് ഫ്രാന്സിനെ ഫൈനലിലെത്തിച്ച ദെഷാംപ്സ് 2021ല് ഫ്രാന്സിന് പ്രഥമ യുവേഫ നേഷന്സ് ലീഗ് കിരീടം സമ്മാനിക്കുകകുയം ചെയ്തു.
1998ല് ഫ്രാന്സ് ആദ്യകിരീടം നേടുമ്പോള് പ്രതിരോധത്തില് ദെഷാംപസുമുണ്ടായിരുന്നു. അദ്ദേഹമായിരുന്നു ക്യാപ്റ്റന്. 2018ല് ലോകകപ്പ് നേട്ടത്തിലൂടെ ക്യാപ്റ്റനായും കോച്ചായും ലോക കിരീടം സ്വന്തമാക്കുന്ന ചരിത്രത്തിലെ രണ്ടാം താരമാകാന് ദെഷാംപ്സിന് സാധിച്ചു. 1998 ലോകകപ്പില് ഫ്രഞ്ച് ടീമിന്റെ എല്ലാമായിരുന്ന സിനദിന് സിദാന് ആണ് ഫ്രാന്സിന്റെ അടുത്ത പരിശീലകനായെത്തുന്നത്. കളത്തില് ഇതിഹാസ തുല്യമായ പ്രകടനം കാഴ്ച്ചവച്ചിട്ടുള്ള സിദാന് കോച്ചെന്ന നിലയില് അമ്പരപ്പിക്കുന്ന പ്രകടനം പുറത്തെടുത്താണ് അരങ്ങേറിയത്. 2016 മുതല് 2018 വെരെയുള്ള കാലയളവില് സ്പാനിഷ് ടീം റയല് മാഡ്രിഡിന് തുടര്ച്ചയായി മൂന്ന് സീസണുകളില് യുവേഫ ചാമ്പ്യന്സ് ലീഗ് കിരീടം നേടിക്കൊടുക്കാന് സിദാന് സാധിച്ചിരുന്നു.
