സ്പെയിനിന് വേണ്ടി ആദ്യ ഗോള് നേടിയ മികെല് ഒയാഴ്സബാലിന്റെവിജയാഹ്ളാദം.
ടെക്സാസ്: പന്ത് നല്കാതെയുള്ള പൊസെഷന് ഫുട്ബാള് കളിച്ച സ്പാനിഷ് മാജികില് ഫ്രാന്സ് വീണു. എംബാപ്പെ മാജിക് യമാലിന്റെയും കൂട്ടരുടെയും അതിവേഗ ഫുട്ബാളിന് മുന്നില് വിലപ്പോയില്ല. എതിരില്ലാത്ത രണ്ടു ഗോളുകള്ക്കാണ് സ്പെയിന് ഫ്രാന്സിനെ തോല്പിച്ചത്. ആദ്യപകുതിയില് 22ാം മിനിറ്റില് മികെല് ഒയാഴ്സബാല് അടിച്ച ഗോളിന് സ്പെയിന് മുന്നിലെത്തി.
58ാം മിനിറ്റില് പെഡ്രോ പോറോ വീണ്ടും ഫ്രാന്സിന്റെ വല കുലുക്കി. ആദ്യ ഗോള് അടിച്ചിട്ടും ആക്രമണോത്സുകത വിടാതെ ഉടനീളം കളിച്ച സ്പെയിന് ഫ്രാന്സിനെ പ്രതിരോധത്തിലാക്കി. സ്പെയിന്റെ ആക്രമണങ്ങളെ ചെറുക്കുന്നതില് ഫ്രാന്സ് പതറി. പന്ത് വിട്ടുകൊടുക്കാതെ കൈവശം വെയ്ക്കുന്ന രീതിയും തന്ത്രപരമായ നിയന്ത്രണവും ചേര്ന്ന് കളിയുടെ ഗതി പാടെ സ്പെയിന് കയ്യടക്കുകയായിരുന്നു.
ഡിഫന്സിലും ആക്രമണത്തിലും നിറഞ്ഞു കളിക്കുകയായിരുന്നു സ്പെയിന്. ഫ്രാന്സിന്റെ കുന്തമുനയായ കിലിയന് എംബാപ്പെയെ സ്പാനിഷ് പ്രതിരോധം നിഷ്പ്രഭമാക്കി. എംബാപ്പെ- ഡെംബലെ കൂട്ടുകെട്ടിനും ഒന്നും ചെയ്യാനായില്ല. മൂന്നാമതൊരു ഗോള് കൂടി സ്പെയിന് യമാലിലൂടെ നേടിയതായിരുന്നു. മനോഹരമായ ഹെഡറിലൂടെയാണ് യമാല് ഫ്രാന്സിന്റെ വല കുലുക്കിയത്. പക്ഷെ റഫറി അത് ഓഫ്സൈഡ് വിധിക്കുകയായിരുന്നു.
ക്വാര്ട്ടര് വരെയുള്ള മത്സരങ്ങളില് നിറഞ്ഞു കളിച്ച ഫ്രാന്സിന്റെ വെറും നിഴല് മാത്രമാണ് സെമിയില് സ്പെയിനിനെതിരെ കണ്ടത്. ഫ്രാന്സിന്റെ പ്രതിരോധത്തെ കീറിമുറിച്ച് സ്പാനിഷ് പട കുതിച്ചപ്പോള് പ്രത്യാക്രമണം നടത്തിയ ഫ്രാന്സിന് പലപ്പോഴും പിഴച്ചു. കൃത്യമായി പാസുകള് കൈമാറുന്നതില് പോലും ഫ്രാന്സ് പരാജയപ്പെട്ടു.
ഹൈഡ്രേഷന് ബ്രേക്കിന് ശേഷം ഫ്രാന്സ് ടീമില് രണ്ട് മാറ്റങ്ങള് വരുത്തിയിട്ടും നേട്ടങ്ങളുണ്ടാക്കാന് സാധിച്ചില്ല.
