ന്യൂദല്‍ഹി: ‘ദയവായി പറയൂ, ഏത് അഭിഭാഷകനാണ് തന്റെ ആദായനികുതി റിട്ടേണുകളില്‍ യഥാര്‍ത്ഥ വരുമാനം വെളിപ്പെടുത്തുന്നത്?’ ജസ്റ്റിസ് ബി.വി. നാഗരത്‌നയുടെ ചോദ്യം സുപ്രീം കോടതി മുറിയിലെ അഭിഭാഷകരില്‍ നിന്ന് ചിരി പടര്‍ത്തി.
തമിഴ്നാട് ജുഡീഷ്യല്‍ സര്‍വീസിലേക്കുള്ള ഒരു അഭിഭാഷകന്റെ താല്‍ക്കാലിക നിയമനം റദ്ദാക്കിയ നടപടി ശരിവച്ച മദ്രാസ് ഹൈക്കോടതി വിധിക്കെതിരായ ഹര്‍ജിയില്‍ വാദം കേള്‍ക്കുകയായിരുന്നു ജസ്റ്റിസ് നാഗരത്‌ന്.
നിയമനം റദ്ദാക്കാന്‍ ഒരു കാരണം അഭിഭാഷകന് എന്ന നിലയിലുള്ള വരുമാനവുമായി ബന്ധപ്പെട്ടായിരുന്നു. അതേക്കുറിച്ചു പരാമര്‍ശിക്കവെയാണ് ആദായനികുതി റിട്ടേണുകള്‍ സമര്‍പ്പിക്കുമ്പോള്‍ ഏതെങ്കിലും അഭിഭാഷകന് തന്റെ വരുമാനം യഥാര്‍ത്ഥത്തില്‍ വെളിപ്പെടുത്തുന്നുണ്ടോ എന്ന് ജസ്റ്റിസ് നാഗരത്‌ന ചോദിച്ചത്.
താന്‍ ജഡ്ജിയായി ചേര്‍ന്നപ്പോള്‍ 26,000 രൂപയായിരുന്നു ശമ്പളമെന്നും അഭിഭാഷകയെന്ന നിലയില്‍ തന്റെ വരുമാനം അതിനേക്കാള്‍ വളരെ കൂടുതലായിരുന്നുവെന്നും അവര്‍ ഓര്‍മ്മിച്ചു. പല അഭിഭാഷകരും ജുഡീഷ്യല്‍ ഓഫീസര്‍മാരേക്കാള്‍ ഗണ്യമായ തുക സമ്പാദിക്കുന്നുണ്ടെന്നും ജസ്റ്റിസ് അഭിപ്രായപ്പെട്ടു.
