തിരുവനന്തപുരം: അപ്രഖ്യാപിത നിയമന നിരോധനം പ്രഖ്യാപിച്ചും ഒരു വര്ഷമായി നിയമന ഉത്തരവുകള് ഇറക്കാതെയും ഒഴിവുള്ള തസ്തികകള് ജില്ലകളില് നിന്ന് റിപ്പോര്ട്ട് ചെയ്യിപ്പിക്കാതെയും ഉദ്യോഗാര്ത്ഥികളെ വഞ്ചിക്കുകയാണ് ഭരണപ്രതിപക്ഷ മുന്നണികളെന്ന് യുവമോര്ച്ച.
പുതിയ അദ്ധ്യയന വര്ഷത്തെ ‘ബാച്ച് ഫാള്’ പൊതുവിദ്യാഭ്യാസ വകുപ്പ് പ്രഖ്യാപിക്കുന്ന സാഹചര്യം തീര്ത്തും ആശങ്കയോടെ കാണാനാകൂ. ഇത് അനേകം ഉദ്യോഗാര്ത്ഥികളുടെ ഭാവി ഇരുട്ടിലാക്കും. സാങ്കേതിക പ്രശ്നങ്ങള് നിരത്തി യോഗ്യരായ യുവജനങ്ങള്ക്ക് തൊഴില് നിഷേധിക്കുന്ന സമീപനം സതീശന് സര്ക്കാര് അടിയന്തരമായി അവസാനിപ്പിക്കണമെന്നും യുവമോര്ച്ച സംസ്ഥാന ജനറല് സെക്രട്ടറി ഗോകുല് ഗോപിനാഥ് പറഞ്ഞു.
സെക്രട്ടേറിയറ്റിന് മുന്നില് സമരത്തിലുള്ള റാങ്ക് ഹോള്ഡേഴ്സിനെ സന്ദര്ശിച്ച ശേഷം സംസാരിക്കുകയായിരുന്നു അദ്ദേഹം. സ്വന്തക്കാരെയും പാര്ട്ടി അനുഭാവികളെയും പിന്വാതില് വഴി തിരുകിക്കയറ്റാന് വേണ്ടിയാണ് പിഎസ്സി റാങ്ക് ലിസ്റ്റുകള് അട്ടിമറിക്കുന്നത്. അര്ഹതപ്പെട്ട ജോലിക്ക് വേണ്ടി സെക്രട്ടേറിയറ്റിന് മുന്നില് നിരാഹാരം കിടക്കുന്ന ഉദ്യോഗാര്ത്ഥികളുടെ കണ്ണീരിന് മുന്നില് സര്ക്കാര് കണ്ണടയ്ക്കുകയാണ്, ഗോകുല് ഗോപിനാഥ് പറഞ്ഞു. യുവമോര്ച്ച സിറ്റി ജില്ല അധ്യക്ഷന് കെ. വിഷ്ണു, ജില്ല ജനറല് സെക്രട്ടറി നേമം ശ്രീജിത്ത്, ജില്ല ഉപാധ്യക്ഷന് പീറ്റര് സോളമന് എന്നിവരും അദ്ദേഹത്തോടൊപ്പം ഉണ്ടായിരുന്നു.
