കോട്ടയം: ജൂലൈ ആദ്യ പത്തു ദിവസത്തെ കണക്ക് പ്രകാരം സംസ്ഥാനത്ത് ശരാശരി മൂന്ന് ശതമാനം മഴക്കുറവ്. മഴയില് ജില്ലകള് തമ്മില് വ്യക്തമായ അസന്തുലിതാവസ്ഥയുണ്ട്. ഏറ്റവും കൂടുതല് മഴ ലഭിച്ചത് കാസര്കോട് ജില്ലയിലാണ്.
കണ്ണൂര്, കോഴിക്കോട്, പാലക്കാട്, മലപ്പുറം, കോട്ടയം, ആലപ്പുഴ ജില്ലകളിലും ഇക്കാലയളവില് സാധാരണ ലഭിക്കേണ്ടതിലും കൂടുതല് മഴ ലഭിച്ചു. തിരുവനന്തപുരം, കൊല്ലം, ഇടുക്കി, പത്തനംതിട്ട, എറണാകുളം, തൃശൂര്, വയനാട് ജില്ലകളില് സാധാരണ ലഭിക്കേണ്ടതിലും കുറവാണ് പെയ്തത്. എല്ലാ പ്രദേശങ്ങളിലും ഒരേ രീതിയില് മഴപ്പെയ്ത്തുണ്ടായില്ല. ചില മേഖലകളില് ശക്തമായ മഴ ലഭിച്ചപ്പോള് സമീപ ഇടങ്ങളില്പ്പോലും മഴ ഗണ്യമായി കുറവായിരുന്നു. ഇനിയുള്ള ദിവസങ്ങളിലെ മഴയുടെ ശക്തിയും വ്യാപ്തിയും സംസ്ഥാനത്തെ അന്തിമ മഴക്കണക്കില് നിര്ണായക സ്വാധീനം ചെലുത്തും. മഴയുടെ വിതരണത്തിലെ അസന്തുലിതാവസ്ഥ കാര്ഷിക മേഖലയെയും ജലസംഭരണികളെയും ബാധിക്കാനുള്ള സാധ്യതയും കാലാവസ്ഥാ വിദഗ്ധര് ചൂണ്ടിക്കാട്ടുന്നു.
