ന്യൂസിലന്‍ഡ്: ഓക്ലന്‍ഡില്‍ പ്രവാസി ഭാരതീയരെ അഭിസംബോധന ചെയ്യുന്നതിനിടെ പഴയ ന്യൂസിലന്‍ഡ് സന്ദര്‍ശനം ഓര്‍ത്തെടുത്ത് പ്രധാനമന്ത്രി നരേന്ദ്ര മോദി. കഴുത്തില്‍ അണിഞ്ഞിരുന്ന മഫ്‌ലര്‍ കൈയില്‍ എടുത്ത്, അന്ന് സന്ദര്‍ശനത്തിനിടെ തനിക്ക് സമ്മാനിച്ചതാണെന്നും പ്രധാനമന്ത്രി വ്യക്തമാക്കി.
”പ്രധാനമന്ത്രി എന്ന നിലയിലുള്ള തന്റെ ആദ്യ സന്ദര്‍ശനമായിരിക്കാം ഇത്. എന്നാല്‍ 25-30 വര്‍ഷം മുമ്പ്, സര്‍ക്കാരിന്റെ ഭാഗമല്ലാതിരുന്നപ്പോഴും പൊതുജീവിതത്തില്‍ ആരും തന്നെ തിരിച്ചറിയാതിരുന്നപ്പോഴും ന്യൂസിലന്‍ഡ് സന്ദര്‍ശിക്കാന്‍ അവസരം ലഭിച്ചിരുന്നു. അന്ന് ഒരാള്‍ മൂന്ന് വസ്തുക്കള്‍ സമ്മാനമായി നല്‍കി. ഒരു മഫ്‌ലര്‍, ഒരു തൊപ്പി, പിന്നെ ഒരു ജോഡി ഗ്ലൗസുകള്‍. അവയില്‍ ഒന്ന് ഇന്നത്തെ ഈ ചടങ്ങിലേക്ക് കൊണ്ടുവന്നിട്ടുണ്ട്. നിങ്ങള്‍ കാണുന്ന ഈ മ~ര്‍ അന്ന് ഒരു ന്യൂസിലാന്‍ഡ് സ്വദേശി സമ്മാനിച്ചതാണ്. ഈ വര്‍ഷങ്ങള്‍ക്കിടയില്‍ ഇത് പലതവണ ഉപയോഗിച്ചിട്ടുണ്ട്. നിങ്ങളില്‍ നിന്ന് ലഭിക്കുന്ന സ്നേഹത്തെ എങ്ങനെയാണോ കാത്തുസൂക്ഷിക്കുന്നത്, അതുപോലെ തന്നെ ഇതും സൂക്ഷിക്കുന്നു, പ്രധാനമന്ത്രി കൂട്ടിച്ചേര്‍ത്തു.
