തൃശൂര്‍: സാക്ഷാല്‍ ശ്രീകൃഷ്‌ണൻ ദ്വാരകയില്‍ ശത്രുഘ്നന്‍ സ്വാമിയുടെ വിഗ്രഹം പൂജിച്ചിരുന്നുവത്രെ. ഭഗവാന്‍ ശ്രീരാമന്റെ സഹോദരനാണ് ശത്രുഘ്നന്‍. ഈ വിഗ്രഹം ഇപ്പോള്‍ പ്രതിഷ്‌ഠിച്ചിരിക്കുന്നത് കേരളത്തിലെ ഒരു ക്ഷേത്രത്തിലാണ്.
ആ ക്ഷേത്രം ഏതെന്നറിയാമോ? അതാണ് പായമ്മല്‍ ശത്രുഘ്നന്‍ സ്വാമി ക്ഷേത്രം. ദ്വാരക നഗരം കടലെടുത്തുകഴിഞ്ഞ ശേഷം വിഗ്രഹം കേരളത്തിന്റെ കടല്‍ തീരത്ത് എത്തിച്ചേർന്നുവെന്നാണ് ഐതിഹ്യം.
സ്വപ്‌ന ദർശനത്തിലെ നിർദേശപ്രകാരം വക്കയികൈമള്‍ ആണ് പായമ്മല്‍ ക്ഷേത്രം നിര്‍മ്മിച്ചത്. എവിടെയാണ് പായമ്മല്‍ ക്ഷേത്രം എന്നറിയാമോ? തൃശൂര്‍ ജില്ലയിലെ പൂമംഗലത്താണ് ഈ ക്ഷേത്രം. മഹാവിഷ്‌ണുവിന്റെ കയ്യിലെ സുദർശന ചക്രമാണ് ശത്രുഘ്‌നനായി അവതാരമെടുത്തതെന്നാണ് വിശ്വാസം.
ടിപ്പു സുല്‍ത്താന്റെ നേതൃത്വത്തില്‍ ഈ ക്ഷേത്രം ആക്രമിക്കാന്‍ പദ്ധതിയുണ്ടായിരുന്നു. പക്ഷെ ടിപ്പുവില്‍ നിന്നും വിഗ്രഹത്തെ രക്ഷിക്കാന്‍ ഈ പഞ്ചലോഹ വിഗ്രഹം ക്ഷേത്രക്കുളത്തില്‍ മുക്കിവെച്ചു. പിന്നീട് ഈ വിഗ്രഹം കണ്ടെത്താന്‍ സാധിച്ചില്ല. തുടര്‍ന്നാണ് പിന്നീട് ഒരു പുതിയ കല്‍വിഗ്രഹം കൊണ്ട് പുനഃപ്രതിഷ്‌ഠ നടത്തിയത്.
പായമ്മല്‍ ക്ഷേത്രം നാലമ്പലങ്ങളില്‍ ഒന്ന്
കേരളത്തില്‍ തൃശൂര്‍ ജില്ലയിലെ ഭക്തര്‍ നാലമ്പലം തൊഴാന്‍ തെരഞ്ഞെടുക്കുന്ന അമ്പലങ്ങളില്‍ ഒന്നാണ് പായമ്മല്‍ ക്ഷേത്രം.രാമായണത്തിലെ നാല് സഹോദരന്മാരായ ശ്രീരാമൻ, ഭരതൻ, ലക്ഷ്മണൻ, ശത്രുഘ്നൻ എന്നിവരുടെ ക്ഷേത്രങ്ങളിൽ ഒരേ ദിവസം ദർശനം നടത്തുന്നതിനെയാണ് ‘നാലമ്പല ദർശനം’ എന്ന് പറയുന്നത്. തൃശൂർ ജില്ലയിലെ നാലമ്പല ദർശനം ഏറെ പ്രശസ്തമാണ്. അതില്‍ ഉള്‍പ്പെട്ട ക്ഷേത്രങ്ങള്‍ തൃപ്രയാര്‍ ശ്രീരാമസ്വാമി ക്ഷേത്രം, ഇരിങ്ങാലക്കുട കൂടല്‍മാണിക്യക്ഷേത്രം, മൂഴിക്കുളം ലക്ഷ്മണസ്വാമി ക്ഷേത്രം, പായമ്മല്‍ ശത്രുഘ്നന്‍ ക്ഷേത്രം എന്നിവ.
നാലമ്പലങ്ങളില്‍ ഏറ്റവും ചെറിയ ക്ഷേത്രവും ഇതാണ്. മറ്റ് മൂന്ന് ക്ഷേത്രങ്ങള്‍ക്കും വൃത്താകൃതിയിലുള്ല ശ്രീകോവിലാണെങ്കില്‍ പായമ്മലില്‍ ദീർഘചതുരത്തിലാണ്. ഗണപതിയാണ് ഉപപ്രതിഷ്‌ഠ. സുദർശനചക്രം അർപ്പിക്കുന്നതും സുദർശന പുഷ്‌പാഞ്ജലിയുമാണ് ഇവിടത്തെ പ്രധാന വഴിപാട്. പായമ്മലില്‍ വന്ന് പ്രാർത്ഥിക്കുന്ന ഓരോ ഭക്തനും മനഃസമാധാനം ലഭിക്കുമെന്നാണ് വിശ്വാസം. നാലമ്പല ദർശനം നടത്തുമ്പോള്‍ ഏറ്റവും അവസാനം ദർശനം നടത്തേണ്ടത് പായമ്മല്‍ ശത്രുഘ്ന സ്വാമി ക്ഷേത്രത്തിലാണ്.
ഇരിഞ്ഞാലക്കുട കൂടല്‍മാണിക്യ ക്ഷേത്രത്തില്‍ നിന്നും ഏഴ് കിലോമീറ്റർ അകലെയാണ് പായമ്മല്‍ ക്ഷേത്രം സ്ഥിതിചെയ്യുന്നത്.
