കേരളത്തിന്റെ ഫുട്ബോൾ സംസ്കാരവും, ആവേശവും, സമ്പന്നമായ പാരമ്പര്യവും ആഘോഷിക്കുന്ന ഹോട്ട്സ്റ്റാർ സ്പെഷ്യൽസ് ‘ലാൻഡ് ഓഫ് ഫുട്ബോൾ’-ന്റെ ടീസർ പുറത്തിറങ്ങി. കേരള ടൂറിസത്തിന്റെ സഹകരണത്തോടെ അവതരിപ്പിക്കുന്ന ഈ സ്പെഷ്യൽ പ്രൊഡക്ഷൻ ജൂലൈ 10 മുതൽ ജിയോഹോട്ട്സ്റ്റാറിൽ സ്ട്രീമിംഗ് ആരംഭിക്കും.
ഫുട്ബോൾ കേരളത്തിൽ ഒരു കളി മാത്രമല്ല, മറിച്ച് ജീവിതശൈലിയാണെന്ന ആശയമാണ് ‘ലാൻഡ് ഓഫ് ഫുട്ബോൾ’ പ്രേക്ഷകരിലേക്ക് എത്തിക്കുന്നത്. ലോകമെമ്പാടുമുള്ള സഞ്ചാരികളെ ആകർഷിക്കുന്ന കേരളത്തിന്റെ പ്രകൃതി സൗന്ദര്യം പോലെ തന്നെ, ഫുട്ബോളിനോടുള്ള കേരളത്തിന്റെ അചഞ്ചലമായ സ്നേഹവും അതുല്യമാണ്. 2022-ലെ ഖത്തർ ഫിഫ ലോകകപ്പിനോടനുബന്ധിച്ച് വിവിധ രാജ്യങ്ങളുടെ ജഴ്‌സികൾ അണിഞ്ഞ് ദോഹയുടെ തെരുവുകൾ നിറച്ച മലയാളികൾ ലോകശ്രദ്ധ നേടിയിരുന്നു. ചില അന്താരാഷ്‌ട്ര മാധ്യമങ്ങൾ അവരെ തെറ്റായി “ഫേക്ക് ഫാൻസ്” എന്ന് വിശേഷിപ്പിച്ചെങ്കിലും, അത് യഥാർത്ഥത്തിൽ ഫുട്ബോളിനോടുള്ള കേരളത്തിന്റെ ആത്മാർത്ഥമായ സ്നേഹത്തിന്റെയും ആഴത്തിൽ വേരൂന്നിയ ഫുട്ബോൾ സംസ്കാരത്തിന്റെയും പ്രതിഫലനമായിരുന്നുവെന്ന് ‘ലാൻഡ് ഓഫ് ഫുട്ബോൾ’ ഓർമ്മിപ്പിക്കുന്നു.
ബ്രൗൺ ക്രൂ പ്രൊഡക്ഷൻസിന്റെ ബാനറിൽ വസീം ഹൈദറും അനമയ് പ്രകാശും ചേർന്ന് നിർമ്മിക്കുന്ന ‘ലാൻഡ് ഓഫ് ഫുട്ബോൾ’ സംവിധാനം ചെയ്യുന്നത് ഹസീഫ് ഹക്കീമാണ്. ജൂഷ്ന ഷഹീൻ തിരക്കഥയും സംഭാഷണവും ഒരുക്കുന്നു.
നന്ദ കിഷോറും ദർശനും ചേർന്നാണ് ഛായാഗ്രഹണം നിർവഹിച്ചിരിക്കുന്നത്. ടംജി താഹയാണ് എഡിറ്റിംഗ്. ജയ് ഉണ്ണിത്താനാണ് സംഗീത സംവിധാനം.
ഹോട്ട്സ്റ്റാർ സ്പെഷ്യൽസ് ‘ലാൻഡ് ഓഫ് ഫുട്ബോൾ’ ജൂലൈ 10 മുതൽ ജിയോഹോട്ട്സ്റ്റാറിൽ സ്ട്രീം ചെയ്യുന്നു. ഈ വ്യത്യസ്ത അനുഭവം നഷ്ടപ്പെടുത്തരുത്.
