തിരുവനന്തപുരം: ലക്ഷങ്ങള് മുടക്കി വാങ്ങിയ പുതിയ ജീപ്പുകള് അധികൃതരുടെ കെടുകാര്യസ്ഥതയെ തുടര്ന്ന് തുരുമ്പെടുത്ത് നശിക്കുന്നു. സംസ്ഥാനത്തെ പൊതുമരാമത്ത് ഓഫീസുകളുടെ ആവശ്യങ്ങള്ക്കായി വാങ്ങിയ 23 പുതിയ മഹീന്ദ്ര ബൊലേറോ ജീപ്പുകളാണ് പിഎംജിയിലെ പിഡബ്ല്യുഡി റോഡ്സ് വിഭാഗം എക്സിക്യൂട്ടീവ് എന്ജിനീയറുടെ ഓഫീസ് വളപ്പില് ദിവസങ്ങളായി നിര്ത്തിയിട്ടിരിക്കുന്നത്.
പുതിയ വാഹനങ്ങള് വാങ്ങിയിട്ട് ആഴ്ചകളായിട്ടും അവ നിരത്തിലിറക്കാന് കഴിയാത്തതിന് പിന്നില് ഉദ്യോഗസ്ഥതലത്തിലെ കടുത്ത അനാസ്ഥയും മെല്ലെപ്പോക്കുമാണ്. വാഹനങ്ങള് വാങ്ങിയെങ്കിലും അവയുടെ രജിസ്ട്രേഷന്, ഇന്ഷുറന്സ് തുടങ്ങിയ അടിസ്ഥാന നടപടികള് പൂര്ത്തിയാക്കുന്നതില് വകുപ്പ് കാട്ടുന്ന അലംഭാവമാണ് വാഹനങ്ങളുടെ ഈ ദുരവസ്ഥയ്ക്ക് കാരണം.
സര്ക്കാര് വാഹനങ്ങളുടെ ഇന്ഷുറന്സ് പ്രീമിയം അടയ്ക്കുന്നതിനായി ഫണ്ട് അനുവദിക്കുന്നതിലും ആവശ്യമായ രേഖകള് തയാറാക്കുന്നതിലും, വാഹനങ്ങള് പൂര്ണസജ്ജമാക്കുന്നതിനും ആവശ്യമായ ആക്സസറികള് ഘടിപ്പിക്കുന്നതിനുമുള്ള ഫണ്ട് അനുവദിക്കുന്നതിലെ കാലതാമസവുമാണ് നടപടികള് വൈകിപ്പിക്കുന്നത്. ഇനിയും കുറച്ചുനാള് കൂടി പുത്തന് വാഹനങ്ങള് വെയിലും മഴയും കൊള്ളേണ്ടിവരുമെന്ന് ഉദ്യോഗസ്ഥര് പറയുന്നു.
പുതിയതായി വാങ്ങിയിട്ടും നിരത്തിലിറക്കാന് കഴിയാത്ത സാഹചര്യമായതോടെ, ലക്ഷക്കണക്കിന് രൂപയുടെ പൊതുമുതലാണ് നശിക്കുന്നത്. പുതിയ വാഹനങ്ങള് ദീര്ഘകാലം ഉപയോഗിക്കാതെ കിടന്നാല് എന്ജിന് ഉള്പ്പെടെയുള്ള ഭാഗങ്ങളുടെ പ്രവര്ത്തനക്ഷമതയെ ബാധിക്കുമെന്ന ആശങ്കയും ഉയരുന്നുണ്ട്. വെയിലും മഴയുമേറ്റ് വാഹനം പുറത്ത് കിടക്കുന്നത് എന്ജിന്, പെയിന്റ്, ടയര് തുടങ്ങി വാഹനത്തിന്റെ പ്രധാന ഭാഗങ്ങളുടെ പ്രവര്ത്തനക്ഷമതയെയും ആയുസിനെയും സാരമായി ബാധിക്കും. വാഹനങ്ങള് ആവശ്യമായിരിക്കുന്ന പല ഓഫീസുകളും പഴയ വാഹനങ്ങള് ഉപയോഗിച്ച് കഷ്ടപ്പെടുമ്പോഴാണ്, ലഭ്യമായ പുതിയ വാഹനങ്ങള് കൃത്യസമയത്ത് നിരത്തിലിറക്കാനാകാതെ നശിപ്പിക്കുന്നത്.
ജന്മഭൂമി ഓണ്ലൈന്