തിരുവനന്തപുരം: നഗരസഭയുടെ ലൈസന്‍സ് എടുക്കാതെയും അമിത നിരക്ക് ഈടാക്കിയും നഗരത്തിലെ സ്വകാര്യ വണ്ടിത്താവളങ്ങള്‍. കേരള മുനിസിപ്പാലിറ്റി ആക്ട് 1994 സെക്ഷന്‍ 475 പ്രകാരം നഗരസഭാ ലൈസന്‍സ് ഇല്ലാതെ വണ്ടിത്താവളങ്ങള്‍ ആരംഭിക്കുകയോ പ്രവര്‍ത്തിക്കുകയോ ചെയ്യാന്‍ പാടില്ലെന്ന നിയമങ്ങള്‍ കാറ്റില്‍ പറത്തിയാണ് പ്രവര്‍ത്തനം. കൂടാതെ പൊതുജനങ്ങളില്‍ നിന്ന് ഫീസ് ഈടാക്കി പ്രവര്‍ത്തിക്കുന്ന വ്യാപാര/സേവന പ്രവര്‍ത്തനങ്ങള്‍ നടത്തുന്ന സ്ഥാപനങ്ങള്‍ നഗരസഭയുടെ മുന്‍കൂര്‍ ലൈസന്‍സ് നിര്‍ബന്ധമായും പാങ്ങേണ്ടതാണ്. ലൈസന്‍സില്ലാതെ പ്രവര്‍ത്തിക്കുന്നത് നിയമലംഘനവുമാണ്. എന്നാല്‍ നഗരസഭാ പരിധിയില്‍ ലൈസന്‍സില്ലാതെ പ്രവര്‍ത്തിക്കുന്ന നിരവധി വണ്ടിത്താവളങ്ങളുണ്ട്. കോര്‍പ്പറേഷന്‍ നിശ്ചയിച്ചിട്ടുള്ള തുകയെക്കാള്‍ അമിത നിരക്കാണ് ഇങ്ങനെ പ്രവര്‍ത്തിക്കുന്ന വണ്ടിത്താവളങ്ങളെല്ലാം പൊതുജനങ്ങളില്‍ നിന്ന് ഈടാക്കുന്നത്. പൊതുജനങ്ങളുടെ കീശ കീറുന്നതോടൊപ്പം കോര്‍പ്പറേഷന്റെ വരുമാന നഷ്ടത്തിനും ഇത്തരം അനധികൃത വണ്ടിത്താവളങ്ങള്‍ കാരണമാകുന്നു. വന്‍കിട മാളുകള്‍ മുതല്‍ സാധാരണക്കാര്‍ വരെ അനധികൃത വണ്ടിത്താവളങ്ങള്‍ ആരംഭിച്ചിട്ടുണ്ട്.
അമിത നിരക്ക് ഈടാക്കുന്നുവെന്ന് പൊതുജനങ്ങളില്‍ നിന്ന് ലഭിച്ച പരാതിയെതുടര്‍ന്ന് ഷോപ്പിംഗ് മാളുകള്‍, അശുപത്രികള്‍ എന്നിവിടങ്ങളിലെ വണ്ടിത്താവളങ്ങള്‍, സ്വകാര്യ വ്യക്തികള്‍ നടത്തുന്ന പാര്‍ക്കിംഗ് ഏര്യകള്‍ തുടങ്ങിയ അനധികൃതമായി പ്രവര്‍ത്തിക്കുന്ന പത്തോളം സ്ഥാപനങ്ങള്‍ ലൈസന്‍സ് ഫീസ് പിഴ ഒടുക്കണമെന്നും അല്ലാത്തപക്ഷം അവ അടച്ചുപൂട്ടണമെന്നും കാണിച്ച് നോട്ടീസ് നല്‍കുകയുണ്ടായി. എന്നാല്‍ പിന്നീട് തുടര്‍ നടപടികളൊന്നും ഇക്കാര്യത്തില്‍ നഗരസഭ സ്വീകരിച്ചിട്ടില്ല. 2014-15 സാമ്പത്തിക വര്‍ഷം മുതല്‍ 2024-25 വരെ ഇത്തരത്തില്‍ പല അനധികൃത വണ്ടിത്താവളങ്ങള്‍ക്കും നോട്ടീസ് നല്‍കിയിട്ടുണ്ടെങ്കിലും തുടര്‍ നടപടികള്‍ സ്വീകരിക്കാന്‍ മുന്‍ ഭരണ സമിതിക്ക് കഴിഞ്ഞിട്ടില്ല.
പാര്‍ക്കിംഗ് ഫീസ് ഈടാക്കുന്ന വന്‍കിട മാളുകള്‍ക്കെതിരെ നടപടി സ്വീകരിക്കാന്‍ പോലും മുന്‍ ഭരണസമിതിക്ക് കഴിഞ്ഞിട്ടില്ല. കേരള മുനിസിപ്പാലിറ്റി ബില്‍ഡിംഗ് റൂള്‍സ് പ്രകാരം വന്‍കിട കെട്ടിടങ്ങള്‍ക്ക് അനിവാര്യമായി ഉണ്ടായിരിക്കേണ്ട പാര്‍ക്കിംഗ് ഏര്യ വണ്ടിത്താവളം എന്ന നിര്‍വചനത്തില്‍ ഉള്‍പ്പെടില്ല. കെട്ടിട സമുച്ചയത്തോട് ചേര്‍ന്നാണ് വണ്ടിത്താവളങ്ങള്‍ ആരംഭിക്കുന്നതെങ്കില്‍ ബില്‍ഡിംഗ് റൂള്‍സ് പ്രകാരമുള്ള പാര്‍ക്കിംഗ് ഏര്യ പ്രത്യേകം വേര്‍ തിരിക്കേണ്ടതും ആ സ്ഥലം ഉപഭോക്താക്കള്‍ക്ക് സൗജന്യമായി ലഭ്യമാക്കേണ്ടതുമാണ്. എന്നാല്‍ നഗരത്തിലെ പല വന്‍കിട മാളുകളിലും ഉപഭോക്താക്കളില്‍ നിന്ന് പാര്‍ക്കിംഗ് ഫീസ് വാങ്ങുന്നതായും പരാതിയുണ്ട്. വന്‍കിട മാളുകളിലെ പാര്‍ക്കിംഗ് ഏര്യകള്‍ക്ക് പുറമേ അധികമായി പാര്‍ക്കിംഗ് ഏര്യകള്‍ സജ്ജീകരിച്ചിട്ടുണ്ടെങ്കില്‍ അതിന് നഗരസഭയില്‍ നിന്നും ലൈസന്‍സ് വാങ്ങണമെന്നാണ് ചട്ടം. എന്നാല്‍ പല വന്‍കിട ഷോപ്പിംഗ് മാളുകളിലും അധിക പാര്‍ക്കിംഗ് ഏര്യകള്‍ ലൈസന്‍സ് ഇല്ലാതെയാണ് പ്രവര്‍ത്തിക്കുന്നത്. ഇങ്ങനെ പ്രവര്‍ത്തിക്കുന്ന വണ്ടിത്താവളങ്ങള്‍ കോര്‍പ്പറേഷന്‍ നിശ്ചയിച്ച നിരക്കിനെക്കാള്‍ കൂടിയ തുകയാണ് ഉപഭോക്താക്കളില്‍ നിന്നും വാങ്ങുന്നത്.
ജന്മഭൂമി ഓണ്‍ലൈന്‍