മദ്യലഹരിയിൽ യുവാവ് കഴിച്ചത് ജീവനുള്ള രണ്ട് പാമ്പുകളെ. ജാർഖണ്ഡിലെ ഛത്ര ജില്ലയിലാണ് സംഭവം. കുന്ദ ബ്ലോക്ക് ആസ്ഥാനത്തെ ബർവാദി ഗ്രാമത്തിലെ താമസക്കാരനായ ബുദ്ധ ഭാരതിയുടെ എന്ന 45 കാരനാണ് മദ്യലഹരിയിൽ വീടിനടുത്ത് നിന്ന് രണ്ട് പാമ്പുകളെ പിടികൂടി ജീവനോടെ തിന്നത്.
ഇതിൽ തൃപ്തനാകാതെ മൂന്നാമത്തെ പാമ്പിനെയും കഴിയ്ക്കാൻ തുടങ്ങിയപ്പോഴാണ് കുടുംബാംഗങ്ങൾ ഇക്കാര്യം കണ്ടത്. തുടർന്ന് ഭാരതിയെയ പ്രതാപ്പൂർ കമ്മ്യൂണിറ്റി ഹെൽത്ത് സെന്ററിലേക്ക് കൊണ്ടുപോയി. കൂട്ടത്തിൽ പാമ്പിനെയും തല്ലിക്കൊന്ന് കവറിലാക്കി കൊണ്ടുപോയിരുന്നു.
ഭാരതി രണ്ട് ജീവനുള്ള പാമ്പുകളെ കടിച്ചു തിന്നുവെന്നും തൊട്ടുപിന്നാലെ അയാൾ ധാരാളം മദ്യം കഴിച്ചുവെന്നും ഭാര്യ ഡോക്ടർമാരോട് പറഞ്ഞു. എന്നാൽ ഭാരതിയെ പരിശോധിച്ച ഡോക്ടർമാർക്ക് അയാളുടെ ശരീരത്തിൽ അല്പം പോലും വിഷം കണ്ടെത്താനായില്ല. തന്റെ കരിയറിൽ ഇത്തരത്തിലുള്ള ആദ്യത്തേതും അസാധാരണവുമായ കേസാണിതെന്ന് പ്രതാപ്പൂർ കമ്മ്യൂണിറ്റി ഹെൽത്ത് സെന്ററിന്റെ ചുമതലയുള്ള മെഡിക്കൽ ഓഫീസർ ഡോ. കുമാർ സഞ്ജീവ് പറഞ്ഞു.
‘ ആ മനുഷ്യന്റെ ശരീരത്തിൽ പാമ്പിന്റെ വിഷം കണ്ടെത്തിയില്ലെന്ന് ഉറപ്പുനൽകുന്നു. വിഷം പടരാത്തതിനാൽ, ഭാരതിയുടെ ആരോഗ്യം പൂർണ്ണമായും സാധാരണ നിലയിലാണ്, പക്ഷേ ഡോക്ടർമാർ അദ്ദേഹത്തെ നിരന്തരം നിരീക്ഷിച്ചുകൊണ്ടിരിക്കുകയാണ്. ‘ കുമാർ സഞ്ജീവ് പറഞ്ഞു.
