വാഷിംഗ്ടൺ ; ചൈനയുടെ നവീകരണ ശൃംഖലയെ വെല്ലുവിളിക്കാൻ കരുത്തുള്ള ഏക രാജ്യം ഇന്ത്യയാണെന്ന് യു.എസ്. റിപ്പബ്ലിക്കൻ സെനറ്റർ സ്റ്റീവ് ഡെയ്ൻസ്. വാഷിങ്ടണിൽ നടന്ന യു.എസ്.-ഇന്ത്യ സ്ട്രാറ്റജിക് പാർട്ണർഷിപ് ഫോറം ലീഡർഷിപ്പ് ഉച്ചകോടിയിൽ സംസാരിക്കുകയായിരുന്നു അദ്ദേഹം.
ആഗോളതലത്തിൽ ചൈന ഉയർത്തുന്ന വെല്ലുവിളികളെ പ്രതിരോധിക്കാൻ ഇന്ത്യയും അമേരിക്കയും തമ്മിലുള്ള തന്ത്രപ്രധാന പങ്കാളിത്തം അത്യന്താപേക്ഷിതമാണെന്നും സ്റ്റീവ് ഡെയ്ൻസ് പറഞ്ഞു. ഇന്ത്യയും ചൈനയും തമ്മിലുള്ള വിശ്വാസ്യതയിലെ വലിയ വ്യത്യാസം വ്യക്തമാക്കാൻ അദ്ദേഹം തന്റെ മൊബൈൽ ഫോണിനെയാണ് ഉദാഹരണമാക്കിയത്. ഇന്ത്യ സന്ദർശിക്കുമ്പോൾ താൻ കൂടെ കരുതുന്ന ഫോൺ, ബെയ്ജിങ്ങിലേക്കുള്ള യാത്രകളിൽ വാഷിങ്‌ടണിലെ ഓഫീസിൽ ഉപേക്ഷിക്കാറാണ് പതിവെന്ന് അദ്ദേഹം പറഞ്ഞു.
അമേരിക്കയുമായുള്ള ഇന്ത്യയുടെ പങ്കാളിത്തം ജനാധിപത്യ രാജ്യങ്ങൾക്കും ആഗോള സമൂഹത്തിനും ഒരുപോലെ നിർണായകമാണെന്നും അദ്ദേഹം പറഞ്ഞു.
