തിരുവനന്തപുരം: സംസ്ഥാനത്തെ ഡാമുകളില് വെള്ളം വളരെ കുറവ്. വൈദ്യുതി ക്ഷാമവും രൂക്ഷമാണ്. ഈ സാഹചര്യത്തില് പുറത്തു നിന്ന് കൂടിയ വിലയ്ക്ക് വൈദ്യുതി വാങ്ങാന് റഗുലേറ്ററി കമ്മീഷന് വൈദ്യുതി ബോര്ഡിന് അനുമതിയും നല്കി. എന്നാല് കൂടിയ വിലയ്ക്ക് വൈദ്യുതി വാങ്ങുന്ന പശ്ചാത്തലത്തില് വൈദ്യുതി നിരക്ക് വീണ്ടും കൂട്ടുമോയെന്നാണ് ആശങ്ക.
ജനങ്ങളെ ബാധിക്കുന്ന രീതിയില് ചാര്ജ്ജ് കൂട്ടരുതെന്നും പ്രശ്നത്തിന് മറ്റേതെങ്കിലും രീതിയില് പരിഹാരം കാണണമെന്നുമാണ് കമ്മീഷന്റെ നിര്ദ്ദേശമെങ്കിലും കെഎസ്ഇബി അത് പാലിക്കുമെന്ന് ഒരു ഉറപ്പുമില്ല. എന്തെന്നാല് ഇത്തരം നിര്ദ്ദേശങ്ങള് ലംഘിച്ച പാരമ്പര്യമാണ് ബോര്ഡിന്റേത്. കഴിഞ്ഞ ദിവസ റഗുലേറ്ററി കമ്മീഷന് ഇറക്കിയ ഉത്തരവില് പവര്കട്ട് പൂര്ണമായും വിലക്കിയിട്ടുണ്ട്. ലോഡ് ഷെഡിങ്ങ് ഉണ്ടെങ്കില് ഒരു മണിക്കൂര് മുന്പെങ്കിലും അലേര്ട്ട് നല്കണമെന്നും ഉത്തരവിലുണ്ട്. എന്നാല് ദിവസങ്ങളായി രാത്രിയില് പോലും ഇപ്പോള് ലോഡ് ഷെഡിങ്ങ് ഉണ്ട്, അര മണിക്കൂര്.
കൂടിയ വിലയ്ക്ക് വൈദ്യുതി വാങ്ങാന് അനുമതി കുറച്ചു നാളത്തേക്കാണെങ്കിലും ഇന്നത്തെ സാഹചര്യത്തില് കൂടുതല് ദിവസം വേണ്ടിവരുമെന്നാണ് സൂചന. ജൂലൈ മുതല് ഡിസംബര് വരെ കൂടിയ വിലയ്ക്ക് 308.43 ദശലക്ഷം യൂണിറ്റ് വൈദ്യുതി വാങ്ങാനാണ് അനുമതി. ബോര്ഡിന് ഇത് വന്ഭാരമാണെന്നും ഉത്തരവിലുണ്ട്. യൂണിറ്റൊന്നിന് 9.16 രൂപ വച്ച് വാങ്ങാനാണ് അനുമതി. ഇതോടെ ചെലവ് 282.50 കോടിയാകും. നേരത്തെ 4.64 രൂപയ്ക്ക് വൈദ്യുതി വാങ്ങാനാണ് അനുമതി നല്കിയിരുന്നത്.
