ന്യൂദല്ഹി: ഡൊണാള്ഡ് ട്രംപും ഷീ ജിന്പിങ്ങും തമ്മിലുള്ള കൂടിക്കാഴ്ചയില് ഹാളില് ഇരുവശത്തും 20 വീതം ഉദ്യോഗസ്ഥസംഘം ഇരിക്കുന്നതില് ഒരു സ്ത്രീപോലുമില്ലേ? എന്ന മുന് ഐഎംഎഫ് മേധാവി ഗീതാ ഗോപിനാഥിന്റെ ചോദ്യം സമൂഹമാധ്യമങ്ങളില് ഏറെ ചര്ച്ചാവിഷയമായി. ലോകത്തിലെ ഏറ്റവും വലിയ രണ്ട് സമ്പദ് ഘടനകളുടെ നേതാക്കളായ ട്രംപും ഷീ ജിന്പിങ്ങും തമ്മില് കൂടിക്കാഴ്ച നടത്തുമ്പോള് ഹാളില് ഇരുവശത്തും 20 വീതം ഉദ്യോഗസ്ഥര് ഇരിക്കുമ്പോള് അതില് ഒരു സ്ത്രീപോലുമില്ലാത്തത് വലിയ കുറവാണെന്നായിരുന്നു ഗീതാ ഗോപിനാഥിന്റെ വിമര്ശനം.
“സ്ത്രീകളാണ് ജോലികള് മെച്ചപ്പെട്ട രീതിയില് ചെയ്യുന്നത്. അമേരിക്കയിലും ചൈനയിലും അവിടുത്തെ സാമ്പത്തിക വരുമാനത്തിന്റെ 40 ശതമാനവും സംഭാവന ചെയ്യുന്നത് സ്ത്രീകളാണ്. എന്നിട്ടും ഈ സ്ത്രീകള്ക്ക് ഒരു പ്രാതിനിധ്യവും നല്കാത്തത് കഴിവുള്ളവര്ക്ക് അവസരം നല്കുന്ന സംവിധാനം നശിച്ചുപോയതുകൊണ്ടാണ്.”- ഗീത ഗോപിനാഥ് സമൂഹമാധ്യമത്തില് കുറിച്ചു.
ഇത് യുഎസില് വലിയ ചര്ച്ചയായി. സ്ത്രീകളെ നയതന്ത്രപ്രതിനിധി സംഘത്തില് ഉള്പ്പെടുത്താത്തതിന് ട്രംപിന് വലിയ വിമര്ശനങ്ങള് കേള്ക്കേണ്ടി വന്നിരുന്നു. 2026ല് നടക്കുന്ന ഇത്രയും വലിയ യോഗങ്ങളില് പുരുഷന്മാരുടെ മാത്രം സാന്നിധ്യം ഉണ്ടായിരിക്കുന്നത് മോശമാണെന്നും സ്ത്രീകള്ക്കും പ്രാതിനിധ്യം വേണ്ടതായിരുന്നുവെന്നും ഗീതാ ഗോപിനാഥ് വിമര്ശിച്ചിരുന്നു. ഇത് അഭിപ്രായപ്രകടനങ്ങളിലെ വൈവിധ്യമാണ് ഇല്ലായ്മ ചെയ്യുന്നതെന്നും ഗീതാ ഗോപിനാഥ് പറഞ്ഞു.
ഐഎംഎഫ് മുഖ്യസാമ്പത്തിക വിദഗ്ധയും ഡപ്യൂട്ടി മാനേജിംഗ് ഡയറക്ടറും വരെയായി ഉയര്ന്ന ഗീതാ ഗോപിനാഥ് വിദേശ സര്വ്വകലാശാലകളില് സാമ്പത്തിക ശാസ്ത്രവും പഠിപ്പിക്കുന്നു. മലയാളികള്ക്ക് ഏറെ അഭിമാനിക്കാവുന്ന കാര്യം ഗീതാ ഗോപിനാഥ് മലയാളിയാണെന്നതാണ്. കണ്ണൂരാണ് ഇവരുടെ സ്വദേശം.
