ഗുരുവായൂര്: ഗുരുവായൂര് ദേവസ്വം ആനകള്ക്കായി നടത്തിവരുന്ന വാര്ഷിക സുഖചികിത്സ, നാളെ മുതല് ആരംഭിക്കും. സുഖചികിത്സയുടെ ഉദ്ഘാടനം, ഉച്ചതിരിഞ്ഞ് 3മണിക്ക് സംസ്ഥാന റവന്യൂ (ദേവസ്വം) സെക്രട്ടറി എം.ജി. രാജമാണിക്കം നിര്വ്വഹിക്കും. ദേവസ്വം പുന്നത്തൂര് ആനത്താവളത്തില് നടക്കുന്ന ചടങ്ങില് ദേവസ്വം ചെയര്മാന് എ.വി. ഗോപിനാഥ് അദ്ധ്യക്ഷത വഹിക്കും.
ആനകള്ക്ക് ഔഷധ ചോറുരുള നല്കിയാണ് ഉദ്ഘാടനം. ചടങ്ങില് അഡ്മിനിസ്ട്രേറ്ററുടെ ചുമതല വഹിക്കുന്ന ജില്ലാ കളക്ടര് ശിഖ സുരേന്ദ്രന് പങ്കെടുക്കും. ദേവസ്വം ഭരണസമിതി അംഗങ്ങളായ മല്ലിശേരി പരമേശ്വരന് നമ്പൂതിരിപ്പാട്, ക്ഷേത്രം തന്ത്രിമുഖ്യന് ദിനേശന് നമ്പൂതിരിപ്പാട്, സി. മനോജ്, മനോജ് ബി. നായര്,. കെ.എസ്. ബാലഗോപാല്, എം.യു. ഷിനിജ, ജീവധനം വിദഗ്ധ സമിതി അംഗങ്ങള് എന്നിവര് ചടങ്ങില് സന്നിഹിതരാകും.
ജൂലൈ 30 വരെയാണ് സുഖചികില്സ. ആനകളുടെ ആരോഗ്യ സംരക്ഷണവും, ഒപ്പം ശരീരപുഷ്ടിക്കും ഉപകരിക്കും വിധമുള്ള സമീകൃത ആഹാരമാണ് സുഖചികിത്സയ്ക്കായി നല്കുക. ജീവധനം വിദഗ്ധ സമിതി അംഗങ്ങളായ ഡോ. പി.ബി. ഗിരിദാസ്, ഡോ. എം.എന്. ദേവന് നമ്പൂതിരി, ഡോ. ടി.എസ്. രാജീവ്, ഡോ.കെ.വിവേക്, ഡോ. യു. ഗിരീഷ്, ഡോ. വി.ശബരീനാഥ്, ദേവസ്വം വെറ്ററിനറി സര്ജന് ഡോ. ചാരുജിത്ത് നാരായണന് എന്നിവരുടെ മേല്നോട്ടത്തിലും, നിരീക്ഷണത്തിലു മാണ് സുഖചികിത്സ നടക്കുന്നത്.
ചികിത്സക്കായി 9 ലക്ഷം രൂപയുടെ എസ്റ്റിമേറ്റ് ദേവസ്വം ഭരണസമിതി അംഗീകരിച്ചിട്ടുണ്ട്. 3150 കിലോ അരി,1050 കിലോ ചെറുപയര്, 1050 കിലോ റാഗി,105 കിലോ അഷ്ട ചൂര്ണ്ണം, 262 കിലോ ച്യവനപ്രാശം, മഞ്ഞള്പ്പൊടി, ഷാര്ക്ക ഫറോള്, അയേണ് ടോണിക്ക്, ധാതുലവണങ്ങള് തുടങ്ങിയവയാണ് സുഖചികിത്സയ്ക്ക് ഉപയോഗിക്കുന്നത്.
