കൊച്ചി: നടിയെ ആക്രമിച്ച കേസുമായി ബന്ധപ്പെട്ട് മാദ്ധ്യമങ്ങള്ക്കെതിരെ ദിലീപ് നല്കിയ കേസില് അന്വേഷണം ഉടന് പൂര്ത്തിയാക്കാന് സംസ്ഥാന സര്ക്കാരിന് ഹൈക്കോടതി അന്ത്യശാസനം നല്കി. റിപ്പോര്ട്ടര് ടിവിയും മറ്റ് മാദ്ധ്യമങ്ങളും വാര്ത്ത റിപ്പോര്ട്ട് ചെയ്യുന്നതിനുള്ള നിയന്ത്രണങ്ങള് ലംഘിച്ചുവെന്ന് ആരോപിച്ച് ദിലീപ് 2022 ല് കോടതിയെ സമീപിച്ചിരുന്നു. കേസിലെ രഹസ്യ വിവരങ്ങള് നിയമവിരുദ്ധമായി പ്രസിദ്ധീകരിച്ചുവെന്നാരോപിച്ച് രജിസ്റ്റര് ചെയ്ത സൈബര് കുറ്റകൃത്യ കേസുകളുടെ അന്വേഷണം സമയബന്ധിതമായി പൂര്ത്തിയാക്കണമെന്ന് കോടതി നേരത്തെ പോലീസിനോട് നിര്ദ്ദേശിച്ചിരുന്നതാണ്. ഈ നിര്ദ്ദേശം പാലിക്കുന്നതില് സംസ്ഥാനസര്ക്കാര് പരാജയപ്പെട്ടതായി കോടതി ചൂണ്ടിക്കാട്ടി.
അന്വേഷണം വേഗത്തില് പൂര്ത്തിയാക്കിയില്ലെങ്കില് കോടതിയലക്ഷ്യ നടപടികള് ആരംഭിക്കുമെന്ന് കോടതി വാക്കാല് മുന്നറിയിപ്പ് നല്കി.
അതേസമയം മാദ്ധ്യമ റിപ്പോര്ട്ടുകള് നടന് ദിലീപിനെ എങ്ങനെ സ്വാധീനിച്ചുവെന്ന് ഹൈക്കോടതി ആരാഞ്ഞു. തന്റെ അവകാശങ്ങള് ലംഘിക്കപ്പെട്ടുവെന്ന് ദിലീപിന് അവകാശപ്പെടാന് കഴിയുമോ എന്ന കാര്യത്തില് കോടതി സംശയം പ്രകടിപ്പിക്കുകയും ചെയ്തു.
