ബാള്‍ട്ടിമോര്‍ (യുഎസ്): സമുദ്രാന്തരപര്യവേഷണത്തിന്റെ ഭാഗമായി ഭാരതനാവികസേനയുടെ കപ്പലായ ഐഎന്‍എസ് സുദര്‍ശിനിയുടെ ലോകയാന്‍ 26 ബാള്‍ട്ടിമോറിലെത്തി. ആഗോളസമുദ്രമേഖലയെ ശക്തിപ്പെടുത്തുകയും ഭാരതത്തിന്റെ സമുദ്രപൈതൃകം പ്രദര്‍ശിപ്പിക്കുകയും ഭാരതം-യുഎസ് നാവികബന്ധം ശക്തിപ്പെടുത്തുകയും ചെയ്യുക എന്നതാണ് ഈ പര്യവേഷണത്തിന്റെ ലക്ഷ്യം.
13 രാജ്യങ്ങളിലെ 18 തുറമുഖങ്ങള്‍ സന്ദര്‍ശിച്ച് മധ്യഅറ്റ്‌ലാന്റിക്കിലെ വമ്പന്‍ പാലങ്ങള്‍ക്കടിയിലൂടെ സഞ്ചരിച്ച് ചെസാപീക്, ഡെലവയര്‍ കനാല്‍ കടന്ന് വിര്‍ജീനിയയിലെ നോര്‍ഫോക്ക് വഴിയാണ് യു എസിലെ ബാള്‍ട്ടിമോറിലെത്തിയത്.
ബാള്‍ട്ടിമോറില്‍ എത്തുന്നതിനു മുമ്പ് ജൂണ്‍ 19 മുതല്‍ 23 വരെ നോര്‍ഫോക്കില്‍ നടന്ന സെയില്‍ 250 വിര്‍ജീനിയ ആഘോഷങ്ങളില്‍ ഐഎന്‍എസ് സുദര്‍ശിനി പങ്കെടുത്തിരുന്നു. ഭാരത നാവികസേനയുടെ പരിശീലനകപ്പലായ ഐഎന്‍എസ് സുദര്‍ശിനി ജനുവരി 20 നാണ് കൊച്ചിയില്‍ നിന്ന് ഫളാഗ് ഓഫ് ചെയ്തത്. കൊച്ചിയില്‍ നിന്നാരംഭിച്ച സമുദ്രാന്തരയാത്ര അഞ്ച് മാസത്തിനുള്ളില്‍ 13,000 മൈല്‍ ദൂരം സഞ്ചരിച്ചാണ് നോര്‍ഫോക്കില്‍ എത്തിയത്. വസുധൈവകുടുംബകം എന്ന ആശയത്തെ മുന്‍നിര്‍ത്തിയാണ് ഈ പര്യവേഷണം.
