വിഴിഞ്ഞം: രണ്ട് വര്‍ഷത്തിനിടയില്‍ ആയിരം ചരക്ക് കപ്പല്‍ എത്തുന്ന ചരിത്രനേട്ടം സ്വന്തമാക്കി വിഴിഞ്ഞം അന്താരാഷ്ട്ര തുറമുഖം. ഇന്നലെ വൈകീട്ടോടെ എംഎസ്‌സിയുടെ മദര്‍ഷിപ്പായ ലൂസിയാന വിഴിഞ്ഞത്ത് എത്തിയതോടെയാണ് ഈ നേട്ടം സ്വന്തമാക്കാന്‍ വിഴിഞ്ഞം അന്താരാഷ്ട്ര തുറമുഖത്തിനായത്. ചരക്കുനീക്കത്തിന്റെ ഭാഗമായി 21.1 ലക്ഷം കണ്ടെയ്‌നര്‍ കൈകാര്യം ചെയ്ത ചരിത്രനേട്ടം കൈവരിച്ചതിന് പിന്നാലെയാണ് ആയിരാമത്തെ മദര്‍ഷിപ്പും എത്തിയത്.
മുന്ദ്രയില്‍ നിന്ന് തിരിച്ച ചരക്ക് കപ്പല്‍ ഇന്നലെ വൈകീട്ട് അഞ്ചരയോടെ വിഴിഞ്ഞം തുറമുഖ ബെര്‍ത്തില്‍ അടുപ്പിച്ചു. 4000 കണ്ടെയ്‌നറുകള്‍ കൈകാര്യം ചെയ്ത ശേഷം ലൂസിയാന യൂറോപ്പിലേക്ക് മടങ്ങും. കപ്പലിനെ തുറമുഖ അധികൃതരുടെ നേതൃത്വത്തില്‍ സ്വീകരിച്ചു. മെസ്‌ക്കിന്റെ സാന്‍ ഫെര്‍ണാണ്ടോ എന്ന കപ്പലാണ് വിഴിഞ്ഞം തുറമുഖത്ത് ആദ്യമെത്തിയ ചരക്കുകപ്പല്‍. 2024 ജൂലായ് 11നാണ് ഈ കപ്പല്‍ എത്തിയത്. 2024 ഡിസംബര്‍ 3നാണ് തുറമുഖത്ത് വാണിജ്യ പ്രവര്‍ത്തനങ്ങള്‍ക്ക് തുടക്കമിട്ടത്. തുടര്‍ന്ന് ലോകത്തിന്റെ വിവിധയിടങ്ങളില്‍ നിന്ന് എംഎസ്‌സിയുടെ ഐറിന വെറോണ അടക്കമുള്ള മദര്‍ ഷിപ്പുകളും ഫീഡര്‍ കപ്പലുകളും വിഴിഞ്ഞത്ത് എത്തി മടങ്ങിയിരുന്നു.
അന്താരാഷ്ട്ര കപ്പല്‍ പാതയില്‍ നിന്ന് വെറും 10 നോട്ടിക്കല്‍ മൈല്‍ ദൂരത്തിലാണ് തുറമുഖ ബെര്‍ത്ത്. 20 മീറ്റര്‍ പ്രകൃതിദത്ത ആഴമുള്ളതിനാല്‍ വലിയ കപ്പലുകളെ ഡെഡ്ജിങ്ങിന്റെ ആവശ്യമില്ലാതെ തന്നെ തുറമുഖത്ത് അടുപ്പിക്കാനാകും. 400 മീറ്റര്‍ നീളമുള്ള 67 അള്‍ട്രാ ലാര്‍ജ് കണ്ടെയ്‌നര്‍ കപ്പലുകള്‍ ഉള്‍പ്പെട്ടവയാണ് തുറമുഖത്ത് വന്നുപോയത്.
