കോട്ടയം: ജന്‍മനക്ഷത്ര ഫണ്ട് നല്‍കാത്തവരും കരയോഗ അംഗമല്ലാത്തവരും എന്‍.എസ്.എസ് ജനറല്‍ സെക്രട്ടറിയെ വിമര്‍ശിക്കാന്‍ വരേണ്ടെന്ന് നായര്‍ സര്‍വീസ് സൊസൈറ്റി. ഫേസ് ബുക്ക് പേജിലൂടെയാണ് മേജര്‍ രവിയെ വിമര്‍ശിച്ചുകൊണ്ടുള്ള പോസ്റ്റില്‍ ഈ പ്രതികരണം.
ജീവിതത്തില്‍ ഒരു തവണ പോലും മന്നംസമാധിയില്‍ പോയിട്ടില്ല, ഒരു രൂപ പോലും ജന്‍മനക്ഷത്ര ഫണ്ട് നല്‍കിയിട്ടില്ല. കുടുംബത്തിലെ ഒരാളെയെങ്കിലും കരയോഗത്തില്‍ അംഗമാക്കിയിട്ടില്ല. എതെല്ലാം ചെയതിട്ട് ജനറല്‍ സെക്രട്ടറിയെ വിമര്‍ശിക്കാന്‍ വാ മേജറേ എന്ന് പോസ്റ്റില്‍ പറയുന്നു. എന്നാല്‍ ഈ പോസ്റ്റിനു കീഴെ മേജര്‍ രവി പറഞ്ഞതിനെ പിന്തുണച്ചു കൊണ്ട് ഒട്ടേറെ പേര്‍ രംഗത്തു വന്നു.
സുകുമാരന്‍ നായരുടേത് ഏകാധിപത്യ സ്വഭാവമാണെന്നും എന്‍.എസ്.എസിനെ സ്വന്തം കുടുംബസ്വത്തായാണ് അദ്ദേഹം കാണുന്നതെന്നും മേജര്‍ രവി ആരോപിച്ചിരുന്നു. മോഹന്‍ ലാലിനെ കെഞ്ചി വിളിച്ചുവരുത്തി അപമാനിച്ചു; സുരേഷ് ഗോപിയെ ആട്ടിപ്പായിച്ചു; ഉപരാഷ്‌ട്രപതിയെ വരെ തടഞ്ഞു; സുകുമാരന്‍ നായര്‍ക്ക് അഹങ്കാരത്തിന്റെ അങ്ങേയറ്റമാണെന്നുമായിരുന്നു മേജര്‍ പറഞ്ഞത്.
എന്നാല്‍ ഒരു രാഷ്‌ട്രീയ പാര്‍ട്ടിയുടെ പ്രതിനിധിയായിട്ടല്ല, മറിച്ച് നായര്‍ സമുദായത്തിലെ ഒരംഗം എന്ന നിലയിലാണ് താന്‍ ഈ വിഷയത്തില്‍ പ്രതികരിക്കുന്നതെന്നും മേജര്‍ രവി ഒരു ഓണ്‍ലൈന്‍ മാദ്ധ്യമത്തിനു നല്‍കിയ കൂടിക്കാഴ്ചയില്‍ വ്യക്തമാക്കുകയും ചെയ്തു.
