ലോസ് ആഞ്ചലസ്: ലോകകപ്പ് ഫുട്ബോളില് ഇനി മൂന്നാം റൗണ്ട് പോരാട്ടങ്ങള്. ഗ്രൂപ്പ് ഘട്ടത്തിലെ അവസാന റൗണ്ട് മത്സരങ്ങളാണ് ഇന്ന് രാത്രി മുതല് നാല് ദിവസങ്ങളിലായി നടക്കുക. ഓരോ ദിവസവും മൂന്ന് ഗ്രൂപ്പുകളുടെ വീതം മത്സരങ്ങളാണ് നടക്കുക. നാളെ പുലര്ച്ചെ 3.30ന് നടക്കുന്ന ഗ്രൂപ്പ് സി മത്സരങ്ങളില് ഒന്നില് ബ്രസീല് സ്കോട്ട്ലന്ഡിനെ നേരിടുമ്പോള് മറ്റൊരു കളിയില് മൊറോക്കോ ഹെയ്തിയെ നേരിടും. 2023 ഒക്ടോബറിനു ശേഷം നെയ്മര് മഞ്ഞക്കുപ്പായത്തിലെത്തുന്നു എന്നതാണ് മൂന്നാം റൗണ്ട് ഏറെ ശ്രദ്ധേയോടെ നോക്കുന്ന കാര്യം. പരിക്കിന്റെ പിടിയിലായിരുന്ന നെയ്മര് ആദ്യ രണ്ട് മത്സരങ്ങളിലും കളിച്ചിരുന്നില്ല.
ഇന്ന് രാത്രി 12.30ന് ഗ്രൂപ്പ് ബി മത്സരത്തോടെ മൂന്നാം റൗണ്ട് ആരംഭിക്കും. വാന്കൂവറില് സ്വിറ്റ്സര്ലന്ഡ് കാനഡയെ നേരിടുമ്പോള് ഇതേ സമയം സീട്ടില് സ്റ്റേഡിയത്തില് ബോസ്നിയ ഖത്തറുമായി ഏറ്റുമുട്ടും. നാല് വീതം ടീമുകള് അണിനിരക്കുന്ന ഗ്രൂപ്പ് റൗണ്ടിലെ അവസാന ലോകകപ്പ് പോരാട്ടങ്ങള് എല്ലാ തവണയും ഒരേ സമയത്താണ് നടക്കുക. ഏതെങ്കിലും വിധത്തില് ഉണ്ടാകാന് സാധ്യതയുള്ള ഒത്തുകളി ഒഴിവാക്കാനാണിത്. രാത്രി 12.30ന് നടക്കുന്ന ഗ്രൂപ്പ് ബിയിലെ രണ്ട് മത്സരങ്ങള് കഴിയുന്നതോടെ ഇവിടെ നിന്നും നോക്കൗട്ടില് പ്രവേശിക്കുന്ന ഗ്രൂപ്പ് ജേതാക്കളെയും റണ്ണറപ്പുകളെയും അറിയാന് സാധിക്കും.
നാളെ വെളുപ്പിന് 6.30ന് നടക്കുന്ന ഗ്രൂപ്പ് എ മത്സരങ്ങളില് ദക്ഷിണാഫ്രിക്ക-ദക്ഷിണ കൊറിയ പോരാട്ടവും ചെക്ക് റിപ്പബ്ലിക്-മെക്സിക്കോ പോരാട്ടവും നടക്കും.
നിലവില് ഈ മൂന്ന് ഗ്രൂപ്പുകളിലെ 12 ടീമുകളില് നിന്ന് മെക്സിക്കോ മാത്രമാണ് നോക്കൗട്ട് ബെര്ത്ത് ഉറപ്പിച്ചിട്ടുള്ളത്. ആദ്യ രണ്ട് മത്സരവും ജയിച്ച് ആറ് പോയിന്റുമായാണ് ടീം നോക്കൗട്ട് ഉറപ്പിച്ചത്. ആദ്യ മത്സരത്തില് സമനിലയില് കുരുങ്ങിയ ബ്രസീലിന് നാല് പോയിന്റാണുള്ളത്. ഗ്രൂപ്പിലെ മറ്റ് ടീമുകളില് ഹെയ്തി പുറത്തായിട്ടുണ്ട്. സ്കോട്ട്ലന്ഡിനും മൊറോക്കോയ്ക്കും മുന്നേറാനുള്ള സാധ്യതയുണ്ട്. കൂടുതല് പരീക്ഷണത്തിന് നില്ക്കാതെ ജയത്തില് കുറഞ്ഞ ഒന്നും പ്രതീക്ഷിക്കാതെയായിരിക്കും ബ്രസീല് കളത്തിലിറങ്ങുക.
