സമീപ വർഷങ്ങളിൽ, ഇന്ത്യയുടെ പ്രതിരോധ നയത്തിലും കയറ്റുമതി ശേഷിയിലും ഏറെ മാറ്റങ്ങൾ ഉണ്ടായിട്ടുണ്ട്. ബ്രഹ്മോസ് മിസൈലുകൾക്കായി യുഎഇയുമായുള്ള കരാറും ഇസ്രായേലുമായുള്ള ആയുധ നിർമ്മാണ പങ്കാളിത്തവും ഇതിന് പ്രധാന ഉദാഹരണങ്ങളാണ്. ഇറാൻ-ഇസ്രായേൽ സംഘർഷം മിഡിൽ ഈസ്റ്റിലുടനീളം സുരക്ഷാ ആശങ്കകൾ വർദ്ധിപ്പിച്ചിട്ടുണ്ട്, ഇത് പല രാജ്യങ്ങളെയും പുതിയതും വിശ്വസനീയവുമായ ആയുധങ്ങൾ തേടാനും പ്രേരിപ്പിച്ചു.ഒരുകാലത്ത് പ്രാഥമികമായി ഇറക്കുമതിക്കാരായിരുന്ന ഇന്ത്യ ഇന്ന് ഇപ്പോൾ പ്രധാന കയറ്റുമതി രാജ്യമായി ഉയർന്നുവരികയാണ്.
ഓപ്പറേഷൻ സിന്ദൂരിലൂടെ ലോകരാജ്യങ്ങൾക്ക് മുന്നിൽ കരുത്ത് തെളിയിച്ച ബ്രഹ്മോസ് മിസൈൽ, ആകാശ് വ്യോമ പ്രതിരോധ കമാൻഡ്-ആൻഡ്-കൺട്രോൾ സിസ്റ്റം എന്നിവ ഇന്ത്യയോട് ആവശ്യപ്പെട്ടിരിക്കുന്നത് യുഎഇയാണ്. തദ്ദേശീയമായി നിർമ്മിച്ച ഇന്ത്യൻ പ്രതിരോധ സംവിധാനങ്ങൾ കയറ്റുമതി ചെയ്യുന്നതിനെക്കുറിച്ച് ഇന്ത്യയും യുണൈറ്റഡ് അറബ് എമിറേറ്റ്സും (യുഎഇ) പ്രാഥമിക ചർച്ചകൾ നടത്തിവരികയാണെന്ന് പ്രതിരോധ വൃത്തങ്ങൾ പറയുന്നു.
ഇന്ത്യ പൂർണ്ണമായും തദ്ദേശീയമായി വികസിപ്പിച്ചെടുത്ത പ്രമുഖ ഉപരിതല-വ്യോമ പ്രതിരോധ മിസൈൽ സംവിധാനമാണ് ‘ആകാശ്’. ശത്രുവിമാനങ്ങൾ, ഡ്രോണുകൾ, ഹെലികോപ്റ്ററുകൾ എന്നിവയെ വളരെ ദൂരെവെച്ചുതന്നെ തകർക്കാൻ ഈ സംവിധാനത്തിന് സാധിക്കും. യുഎഇ ഈ സംവിധാനത്തിൽ ഏറെ താല്പര്യവും അറിയിച്ചിട്ടുണ്ട്.
സമീപ വർഷങ്ങളിൽ യുണൈറ്റഡ് അറബ് എമിറേറ്റ്സ് തങ്ങളുടെ സുരക്ഷാ സംവിധാനം ആധുനികവൽക്കരിക്കുന്നതിൽ ശ്രദ്ധ കേന്ദ്രീകരിച്ചിട്ടുണ്ട്. പശ്ചിമേഷ്യയിലെ സമീപകാല സംഘർഷങ്ങൾ, ഇറാനുമായുള്ള സംഘർഷങ്ങൾ, കടൽ പാതകളുടെ സുരക്ഷ എന്നിവ യുഎഇയെ പുതിയ പ്രതിരോധ സംവിധാനങ്ങൾ തേടുന്നതിലേക്ക് നയിക്കുകയായിരുന്നു.
ഗൾഫ് മേഖലയിൽ ചൈനയുടെ വർദ്ധിച്ചുവരുന്ന സ്വാധീനത്തെ ചെറുക്കാൻ ഇന്ത്യയ്ക്ക് ഇതൊരു അവസരമാണ്. മാത്രമല്ല ഈ കരാർ ഇന്ത്യയുടെ പ്രതിരോധ കയറ്റുമതിയെ പുതിയ ഉയരങ്ങളിലേക്ക് കൊണ്ടുപോകുകയും ഗൾഫ് മേഖലയിലേക്കുള്ള കയറ്റുമതി കൂടുതൽ ശക്തിപ്പെടുത്തുകയും ചെയ്യും.
ബ്രഹ്മോസ് പോലുള്ള ദീർഘദൂര മിസൈലുകളും ആകാശ് പോലുള്ള കമാൻഡ് സിസ്റ്റങ്ങളും യുഎഇയെ ശക്തമായ വ്യോമ, തീരദേശ പ്രതിരോധം തീർക്കാൻ പ്രാപ്തമാക്കും. ഗൾഫിൽ വർദ്ധിച്ചുവരുന്ന അനിശ്ചിതത്വത്തിനിടയിൽ, ഇന്ത്യ പോലുള്ള വിശ്വസ്ത പങ്കാളികളുമായി യുഎഇ സഹകരണം വർദ്ധിപ്പിക്കുകയാണ്.
കഴിഞ്ഞ കുറച്ച് വർഷങ്ങളായി ഇന്ത്യ പ്രതിരോധ കയറ്റുമതി പ്രോത്സാഹിപ്പിച്ചുവരികയാണ്. 2014 ൽ പ്രതിരോധ കയറ്റുമതി ₹800-900 കോടി മാത്രമായിരുന്നെങ്കിൽ ഇപ്പോൾ അവ ₹20,000 കോടി കവിഞ്ഞു. ബ്രഹ്മോസ്, ആകാശ്, തേജസ്, ആകാശ് മിസൈലുകൾ തുടങ്ങിയ സംവിധാനങ്ങൾ ഇപ്പോൾ വിദേശ വിപണിയിൽ താൽപ്പര്യം ജനിപ്പിക്കുന്നു.യുഎഇക്ക് പുറമേ, അർമേനിയ, തായ്ലൻഡ്, സിംഗപ്പൂർ, ബ്രൂണൈ, ഈജിപ്ത്, സൗദി അറേബ്യ, ഖത്തർ, ഒമാൻ, ബ്രസീൽ, ചിലി, അർജന്റീന, വെനിസ്വേല തുടങ്ങിയ രാജ്യങ്ങളും ബ്രഹ്മോസിൽ താൽപ്പര്യമറിയിച്ചിട്ടുണ്ട്.
