തിരുവനന്തപുരം: എൽഡിഎഫ് സർക്കാരിന്റെ മദ്യനയം തിരുത്തുമെന്ന പ്രതീക്ഷകൾക്ക് വിരുദ്ധമായി, ‘വീര്യം കുറഞ്ഞ മദ്യത്തിന് കുറഞ്ഞ നികുതി’ എന്ന അതേ നയം യുഡിഎഫ് സർക്കാരും പിന്തുടരുന്നത് നിരാശാജനകമാണെന്ന് ബിജെപി നേതാവ് വി. മുരളീധരൻ എംഎൽഎ. ഇത് സംസ്ഥാനത്തെ യുവതലമുറയെ മദ്യത്തിലേക്കും ലഹരിയിലേക്കും കൂടുതൽ ആകർഷിക്കാൻ ഇടയാക്കുമെന്നും, ഇത് കേരളത്തിന്റെ സാമൂഹികാന്തരീക്ഷത്തിൽ ഗുരുതരമായ പ്രത്യാഘാതങ്ങൾ സൃഷ്ടിക്കുമെന്നും അദ്ദേഹം പറഞ്ഞു.
ധനകാര്യ വകുപ്പിന്റെ കൂടി ചുമതല വഹിക്കുന്ന മുഖ്യമന്ത്രി, പൊതുസമൂഹത്തെ ഇത്രത്തോളം പ്രതികൂലമായി ബാധിക്കുന്ന ഒരു തീരുമാനത്തിലേക്ക് എത്തിയതിന്റെ പിന്നിലുള്ള യഥാർത്ഥ കാരണങ്ങളും താല്‍പ്പര്യങ്ങളും വ്യക്തമാക്കേണ്ടതുണ്ട്. മുൻകാലങ്ങളിൽ സംസ്ഥാന രാഷ്‌ട്രീയത്തെ പിടിച്ചുകുലുക്കിയ ‘ബാർകോഴ’ വിവാദത്തിന്റെ പശ്ചാത്തലത്തിൽ വിലയിരുത്തുമ്പോൾ, ഇപ്പോഴത്തെ ഈ മദ്യനയ മാറ്റത്തിന് പിന്നിലും സമാനമായ അവിശുദ്ധ ഇടപാടുകളുണ്ടോ എന്ന ഗുരുതരമായ സംശയം പൊതുസമൂഹത്തിൽ ശക്തമാണെന്നും മുരളീധരൻ പറഞ്ഞു.
കേരള ബജറ്റിൽ കണ്ടത് നടപ്പിലാകാത്ത പ്രഖ്യാപനങ്ങളുടെ പെരുമഴയാണെന്നും അദ്ദേഹം കുറ്റപ്പെടുത്തി. നിയമസഭയിൽ ബജറ്റ് ചർച്ചയിൽ പങ്കെടുത്ത് സംസാരിക്കുകയായിരുന്നു മുരളീധരൻ.
