കണ്ണൂര്: വാണിയപ്പാറ ഇന്ഫന്റ് ജീസസ് പള്ളിയിലെ കല്ലറയില് മൃതദേഹത്തിലെ ദുരൂഹതയില് കല്ലറ തുറന്ന് പരിശോധന നടത്താന് തീരുമാനം.കേസെടുക്കാനും തീരുമാനമായി. ഉന്നത പൊലീസ് ഉദ്യോഗസ്ഥര് പങ്കെടുത്ത യോഗത്തില് ആണ് തീരുമാനം.
ഇന്ന് തന്നെ എഫ്ഐആര് രജിസ്റ്റര് ചെയ്യും. ആര്ഡിഒയുടെ അനുമതി ലഭിച്ചാലുടന് കല്ലറ തുറന്ന് പരിശോധിക്കുമെന്ന് പൊലീസ് അറിയിച്ചു.കല്ലറയ്ക്ക് പൊലീസ് കാവല് ഏര്പ്പെടുത്താനും തീരുമാനമായി.
വാണിയപ്പാറ ഇന്ഫന്റ് ജീസസ് ഉണ്ണിമിശിഹാ ദേവാലയ സെമിത്തേരിയുടെ 38ാം നമ്പര് കല്ലറയില് കണ്ട പായില് പൊതിഞ്ഞ മൃതദേഹ സാദൃശ്യമുള്ള വസ്തുവിലാണ് ദുരൂഹത.എന്താണ് ആ വസ്തുവെന്നും നേരത്തെയുള്ള മൃതദേഹ അവശിഷ്ടമാണോ എന്നും തിരിച്ചറിഞ്ഞാല് മാത്രമേ ദുരൂഹത ഒഴിവാകൂ.
മറ്റൊരു മൃതദേഹം സംസ്കരിക്കാന് ഈ മാസം 13ന് കല്ലറ തുറന്നപ്പോഴാണ് സംശയകരമായ രീതിയില് മൃതദേഹ സാദൃശ്യമുള്ള വസ്തു കണ്ടത്. ശവപ്പെട്ടിക്ക് സമീപം ചെരിച്ചു വച്ച നിലയില് ആണ് ഇത് ഉണ്ടായിരുന്നത്. നേരത്തെ 2006ല് മരിച്ച റോസമ്മ, 2015ല് മരിച്ച ജെയ്സണ് എന്നിവരുടെ മൃതദേഹങ്ങളാണ് ഈ കല്ലറയില് അടക്കിയിരുന്നത്.
