കൊച്ചി: താരസംഘടന അമ്മയില് വാര്ഷിക പൊതുയോഗത്തിലെ തര്ക്കത്തിന് പിന്നാലെ ഭരണസമിതി രാജിവെച്ചു.പ്രസിഡന്റ് ശ്വേത മേനോന്, ജനറല് സെക്രട്ടറി കുക്കു പരമേശ്വരന് തുടങ്ങി എല്ലാ അംഗങ്ങളും രാജിവെച്ചു. ഈ സാഹചര്യത്തില് അമ്മയില് വീണ്ടും അഡ്ഹോക്ക് കമ്മിറ്റി രൂപീകരിക്കും. പുതിയ സമിതിയെ ഉടന് തീരുമാനിക്കും.
ഞായറാഴ്ച രാവിലെ തുടങ്ങിയ ‘അമ്മ’യുടെ പൊതുയോഗത്തില് വാര്ഷിക റിപ്പോര്ട്ടും വരവ് ചെലവ് കണക്കുകളും പാസാക്കുന്നതിനെച്ചൊല്ലി വലിയ തര്ക്കവും നാടകീയ രംഗങ്ങളുമാണ് ഉണ്ടായത്. ഇതോടെ അധ്യക്ഷ സ്ഥാനം രാജിവയ്ക്കുകയാണെന്ന് ശ്വേത മേനോന് സ്റ്റേജില് കയറി പ്രഖ്യാപിച്ചു. തനിക്ക് യാതൊരുവിധ രാഷ്ട്രീയവുമില്ലെന്നും എന്നാല് തന്നെ ബി ജെ പിക്കാരിയാക്കാന് ബോധപൂര്വമായ ശ്രമം നടക്കുന്നുവെന്നും നടി പറഞ്ഞു.
തുടര്ന്ന് സ്റ്റേജില് നിന്നും ഇറങ്ങിപ്പോയ ശ്വേതയെ നടന് ബാബുരാജിന്റെ നേതൃത്വത്തില് മുതിര്ന്ന അംഗങ്ങള് ചേര്ന്ന് അനുനയിപ്പിക്കാനും തിരികെ വിളിക്കാനും ശ്രമിച്ചു. പിന്നാലെയാണ് ഭരണസമിതി ഒന്നടങ്കം രാജിവെച്ചത്.
ജനറല് സെക്രട്ടറി കുക്കു പരമേശ്വരന് അവതരിപ്പിച്ച വാര്ഷിക റിപ്പോര്ട്ടിലെ വരവ് ചെലവ് കണക്കുകളില് വ്യക്തതയില്ലെന്ന് ആരോപിച്ച് സിദ്ദിഖ്, ബാബുരാജ്, ഇടവേള ബാബു എന്നിവരുള്പ്പെടെ പ്രമുഖര് റിപ്പോര്ട്ട് പാസാക്കാന് അനുവദിച്ചില്ല.കണക്കുകളില് പിഴവുകളുള്ള റിപ്പോര്ട്ട് അംഗീകരിക്കാന് കഴിയില്ലെന്ന് രഞ്ജി പണിക്കരും വ്യക്തമാക്കിയതോടെ യോഗം ബഹളത്തിലായി.
തുടര്ന്ന് വിഷയം പഠിക്കാന് 45 ദിവസത്തെ സമയം വേണമെന്ന് പ്രസിഡന്റ് ശ്വേത മേനോന് ആവശ്യപ്പെട്ടു.ഉച്ചയ്ക്ക് ശേഷവും റിപ്പോര്ട്ട് പാസാക്കാനുള്ള തീവ്രശ്രമങ്ങള് തുടരവെയാണ് ശ്വേത മേനോന് രാജി പ്രഖ്യാപിച്ചത്.
