ആലുവ : കുരുക്ഷേത്ര പ്രകാശൻ പ്രസിദ്ധീകരിച്ച അനശ്വര പ്രേരണാ പുരുഷൻ ഭാവുറാവു ദേവറസ് “എന്ന പുസ്തകത്തിന്റെ പ്രകാശനം ആർ എസ് എസ് സഹ സർകാര്യവാഹ് അതുൽ ലിമയെ നിർവഹിച്ചു. ആലുവ അദ്വൈതാശ്രമത്തിൽ ചേർന്ന പ്രാന്ത വാർഷിക ബൈഠക്കിൽ നടന്ന ചടങ്ങിൽ ദക്ഷിണ കേരളം പ്രാന്ത സംഘചാലക് പ്രൊഫ. എം എസ് രമേശൻ പുസ്തകം ഏറ്റുവാങ്ങി. മുതിർന്ന പ്രചാരക് എസ്. സേതുമാധവൻ, പ്രാന്ത കാര്യവാഹ് ടി.വി. പ്രസാദ് ബാബു എന്നിവർ പങ്കെടുത്തു.
പ്രശസ്ത ചരിത്ര ഗവേഷകനും ജീവചരിത്രകാരനുമായ പ്രൊഫ ദേവേന്ദ്ര സ്വരുപ് രചിച്ച പുസ്തകം മലയാളത്തിലേക്ക് മൊഴിമാറ്റിയത് മുതിർന്ന പ്രചാരകൻ എസ് സേതുമാധവനാണ്.
കുരുക്ഷേത്രപ്രകാശൻ മാനേജിംഗ് ഡയറക്ടർ കാ ഭാ സുരേന്ദ്രൻ പുസ്തകം പരിചയപ്പെടുത്തി. നേതൃപരമായ ചുമതല വഹിക്കുന്ന എല്ലാ കാര്യകർത്താക്കളും അവശ്യം കൈവശം വയ്ക്കേണ്ട ഒരു റഫറൻസ് പുസ്തകമാണിത് എന്ന് കാ ഭാ സുരേന്ദ്രൻ പറഞ്ഞു. പ്രധാനപ്പെട്ട വിവിധക്ഷേത്ര സംഘടനകൾ രൂപ വൽക്കരിക്കുന്നതിനും വളർത്തി കൊണ്ടുവരുന്നതിനും മഹത്തായ പങ്കു വഹിച്ച വ്യക്തിയാണ് ഭാവുറാവു ദേവറസ്. ദീനദയാൽ ഉപാധ്യായ, പ്രൊഫ രാജേദ്ര സിങ്, നാനാജി ദേശ്മുഖ്. അടൽ ബിഹാരി വാജ്പേയ് തുടങ്ങി വളരെ പ്രശസ്തരായ ദേശീയ പുരുഷൻമാരെ വളർത്തിയെടുത്ത കാര്യകർത്താവായിരുന്നു ഭാവുറാവു ദേവറസെന്ന് അദ്ദേഹം ചൂണ്ടിക്കാട്ടി.
ഭാവുറാവുജിയുടെ ലേഖനങ്ങൾ ഉൾപ്പെടെ മൂന്നു ഭാഗങ്ങളുള്ള പുസ്തകത്തിൽ, ബാളാസാഹേബ് ദേവറസ്, എച്ച് വി ശേഷാദ്രി, പ്രൊഫ രാജേന്ദ്ര സിങ്, എൽ.കെ. അഡ്വാനി, നാനാജി ദേശ്മുഖ്. കെ. സൂര്യനാരായണറാവു, വി. പി. ഗോയൽ, മദൻദാസ് ദേവി, ആചാര്യ ഗിരിരാജ് കിശോർ. കെ.ആർ. മൽക്കാനി തുടങ്ങി 56 സഹയാത്രികർ തയാറാക്കിയ സ്മരണകൾ പുസ്തകത്തിൽ ഉൾപ്പടുത്തിയിട്ടുണ്ട്. ഓർമ്മക്കുറിപ്പുകൾ എന്നതിലുപരി എങ്ങിനെയാണ് ഭാവുറാവു അവരെ രൂപപ്പെടുത്തിയത് എന്ന തരത്തിലുള്ള വിവരണമാണ് ഈ ലേഖനങ്ങൾ.
