ബോസ്റ്റണ്: കളി തുടങ്ങി 71-ാം സെക്കന്ഡില് നേടിയ ഏക ഗോളിന് സ്കോട്ട്ലന്ഡിനെ കീഴടക്കി മൊറോക്കോ. മധ്യനിരതാരം ഇസ്മയില് സൈബാരിയാണ് വിജയഗോള് നേടിയത്.
മധ്യവരയ്ക്ക് സമീപത്തു നിന്നും ബ്രാഹിം ഡയസ് നല്കിയ ലോങ് പാസ് വലതു വിങ്ങില് സ്വീകരിച്ച് മുന്നേറി ബോക്സില് കയറിയശേഷം സൈബാരി തൊടുത്ത ബുള്ളറ്റ് ഷോട്ട് സ്കോട്ട്ലന്ഡ് ഗോളിക്ക് യാതൊരു അവസരവും നല്കാതെ വലയില് കയറി. ഈ ലോകകപ്പിലെ ഏറ്റവും വേഗമേറിയ ഗോളായിരുന്നു ഇത്. ആദ്യ കളിയില് ബ്രസീലിനോട് സമനില പാലിച്ച മൊറോക്കോ ഈ വിജയത്തോടെ നാല് പോയിന്റുമായി ഗ്രൂപ്പ് സിയില് ബ്രസീലിന് പിന്നില് രണ്ടാം സ്ഥാനത്താണ്.
സ്കോട്ട്ലന്ഡ് 4-4-1-1 ശൈലിയിലും മൊറോക്കോ 4-2-3-1 ശൈലിയിലുമാണ് മൈതാനത്തിറങ്ങിയത്. കളിയില് ഏകദേശം 60 ശതമാനവും പന്ത് കൈവശം വച്ചത് മൊറോക്കോയായിരുന്നു. രണ്ട് ഓണ് ടാര്ഗറ്റ് ഷോട്ടുകളടക്കം 12 തവണ അവര് ഷോട്ട് ഉതിര്ത്തു. അതേസമയം സ്കോട്ട്ലന്ഡിന് ഒരു ഓണ് ടാര്ഗറ്റ് ഷോട്ട് പോലും പായിക്കാനായില്ല.
ലീഡ് നേടിയതോടെ മൊറോക്കോ ആക്രമണം കൂടുതല് കടുപ്പിച്ചു. 10-ാം മിനിറ്റില് അവര്ക്ക് നല്ലൊരു അവസരം ലഭിച്ചെങ്കിലും സൈബാരിയുടെ ക്രോസ് വലയിലെത്തിക്കാന് സഹതാരങ്ങള്ക്കായില്ല. 18-ാം മിനിറ്റിലും മൊറോക്കോ ഗോളിനടുത്തെത്തിയെങ്കിലും അഷ്റഫ് ഹക്കീമിയുടെ ശ്രമം ആന്ഗസ് ഗണ് തടഞ്ഞു. അതേസമയം പ്രതിരോധത്തിന് കരുത്തുകൂട്ടാന് സ്കോട്ട്ലന്ഡ് ഉറപ്പിച്ചതോടെ ആദ്യ പകുതിയില് ഒരു മികച്ച ആക്രമണം പോലും എതിര് ബോക്സിലേക്ക് നടത്താന് അവര്ക്കായില്ല. എന്നാല് ആദ്യ പകുതിയില് അനുവദിച്ച അഞ്ച് മിനിറ്റ് പരിക്ക് സമയത്ത് സ്കോട്ട്ലന്ഡ് കളിയുടെ ഗിയര് മാറ്റി. പ്രതിരോധം വിട്ട് തുടര്ച്ചയായ ആക്രമണങ്ങളിലൂടെ മൊറോക്കോ പ്രതിരോധം വിറപ്പിച്ചെങ്കിലും സമനില ഗോള് നേടാനായില്ല.
രണ്ടാം പകുതിയില് ഇരു ടീമുകളും മികച്ച ഏതാനും മുന്നേറ്റങ്ങള് നടത്തിയെങ്കിലും ഗോള് മാത്രം അകന്നു. 63-ാം മിനിറ്റില് സ്കോട്ട്ലന്ഡ് താരം റയാന് ക്രിസ്റ്റി ബോക്സില് നിന്നും പായിച്ച ഷോട്ട് പോസ്റ്റിന് മുകളിലൂടെ പറന്നു.
84-ാം മിനിറ്റില് സ്കോട്ട്ലന്ഡ് താരം സ്കോട്ട് മക്ടോനിനേ വലതു വിങ്ങിലൂടെ പന്തുമായി മുന്നേറി ഷോട്ട് പായിച്ചെങ്കിലും പുറത്തേക്കാണ് പോയത്. ഇഞ്ചുറി ടൈമില് മൊറോക്കോയുടെ ചെംസ്ഡിന് തല്ബിയുടെ ഷോട്ട് ഗോള് കീപ്പര് രക്ഷപ്പെടുത്തി. വിജയവും മൂന്ന് പോയിന്റും മൊറോക്കോയ്ക്ക് സ്വന്തമായി.
