കൊച്ചി :എടത്തലയില്‍ ഏഴ് വയസുകാരനെ പിതാവ് ചട്ടുകം ചൂടാക്കി പൊള്ളിച്ചു. സഹോദരങ്ങളോട് തല്ലു കൂടിയതിനാണ് പിതാവ് ക്രൂരമായി കുട്ടിയെ മര്‍ദ്ദിച്ചത്. ഇക്കഴിഞ്ഞ മേയ് മാസത്തിലാണ് സംഭവം. ശരീരത്തിന് പിന്നിലും കഴുത്തിന് പിന്നിലുമാണ് പൊള്ളലേല്‍പ്പിച്ചിരിക്കുന്നത്.വീട്ടില്‍ നിന്ന് കുട്ടികളുടെ അസ്വാഭാവികമായ കരച്ചില്‍ കേള്‍ക്കാറുണ്ടായിരുന്നുവെന്ന് അയല്‍വാസികള്‍ പറഞ്ഞു.
പിതാവും മൂന്ന് മക്കളുമാണ് വീട്ടില്‍ താമസിക്കുന്നത്.കുട്ടികളുടെ കരച്ചില്‍ കേട്ട് അയല്‍വാസികളാണ് പൊലീസില്‍ വിവരമറിയിച്ചത്. പൊലീസ് ചോദിച്ചപ്പോള്‍ ചൂട് വെള്ളം വീണാണ് ശരീരം പൊള്ളിയത് എന്നായിരുന്നു കുട്ടിയുടെ മറുപടി. സംശയം തോന്നിയ പൊലീസ് കളമശേരി മെഡിക്കല്‍ കോളജ് ആശുപത്രിയില്‍ കുട്ടിയെ വിശദമായ പരിശോധനയ്‌ക്ക് വിധേയമാക്കി.തുടര്‍ന്ന് 7 വയസുകാരന്‍ തന്നെ പിതാവ് ചട്ടുകം ഉപയോഗിച്ച് പൊള്ളിച്ചതാണെന്ന് പറയുകയായിരുന്നു. ചൈല്‍ഡ് ലൈനിന്റെ നിര്‍ദേശപ്രകാരമാണ് പൊലീസ് കേസെടുത്തത്. നിലവില്‍ ചൈല്‍ഡ് ലൈനിന്റെ സംരക്ഷണയിലാണ് കുട്ടികള്‍.
